Azərbaycan, Bakı, 27 oktyabr /Trend, müxbir İ.Xəlilova/
Azərbaycan şirkətləri öz məhsullarının halal standartlarına cavab verdiyini təsdiq etdirmək üçün 2005-ci ildən Türkiyədə fəaliyyət göstərən Qida Məhsulları və İstehlakçı Mallarının Sertifikasiyası və Nəzarəti Assosiasiyasına (GIMDES) müraciət etməyə başlayıblar. Assosiasiyada sertifikasiyadan keçmək ixracat üçün imkanları genişləndirəcək.
GIMDES-ın baş auditoru, Direktorlar Şurasının üzvü Əli Kayqısız Trend-ə bildirib ki, assosiasiya, əsasən, Türkiyə şirkətlərinə sertifikat verir, lakin məhsulun halal standartına uyğun olduğunu təsdiq edən sənəd Bolqarıstan, Rusiya, Almaniya, Qazaxıstan və Cənubi Koreya şirkətlərinə də verilib.
"Azərbaycan şirkətləri arasında bizə "Dəvəçi Broyler" müraciət edib. Sertifikatımız olduğu təqdirdə şirkət məhsullarını Türkiyəyə və digər ölkələrə ixrac edə bilər", - Kayqısız qeyd edib.
GIMDES-in nümayəndəsinin sözlərinə görə, sertifikat ilk dəfə 1 il müddətinə verilir, sonra hər iki ildən bir yenilənir. Sertifikatın verilməsinə görə 1500-3500 lirə həcmində ödəniş edilir (oktyabrın 27-nə məzənnə 1,7915 TL/USD təşkil edir).
"Təşkilatın məqsədi halal məhsulları sertifikatlaşdırmaqdır. 2009-cu ildən halal məhsulları sertifikasiyadan keçirməyə başlamışıq. Bizə indiyədək halal sertifikatını əldə etmək üçün təqribən 280 şirkət müraciət edib. Sertifikat verdikdən sonra bu firmaların məhsullarına vaxtaşırı nəzarət edirik. İldə iki dəfə xüsusi laboratoriyalarda məhsulların yoxlanılmasını həyata keçiririk, sallaqxanalarda isə müşahidə kameraları quraşdırmışıq", - GIMDES-in Direktorlar Şurasının üzvü bildirib.
Kayqısız deyib ki, halal standartından kənaraçıxmalar aşkar edilən zaman sertifikat dərhal alınır.
