Azərbaycan, Bakı, 20 noyabr /Trend, müxbir A.Axundov/
Sentyabrda Azərbaycan Mərkəzi Bankı (AMB) yanında Mərkəzləşdirilmiş Kredit Reyestri Xidmətinə 97030 müraciət daxil olub. Trend-in məlumatına görə, bu barədə çərşənbə axşamı Azərbaycan Mərkəzi Bankının statistik hesabatında deyilir.
2011-ci ilin analoji dövr göstəricisi (47039 sorğu) ilə müqayisədə Xidmətə müraciətlər iki dəfədən çox artıb.
Sentyabrda banklardan Xidmətə 96896 sorğu daxil olub,134 nəfər öz kredit tarixçəsi barədə məlumat almaq məqsədilə müraciət edib.
Sentyabr ayının sonuna olan məlumata görə, kredit reyestrində haqqında məlumat olan borcalanların sayı 1 409 641, kredit məlumatlarının ümumi sayı isə 3 810 410 təşkil edir.
Reyestrdə olan zaminlər haqqında məlumatların sayı 508 228-dir.
Qeyd edək ki, Mərkəzləşdirilmiş Kredit Reyestri Xidməti 2005-ci ilin martından fəaliyyət göstərir.