Azərbaycan, Bakı, 7 dekabr /Trend, müxbir A.Axundov/
Azərbaycanda sığorta agentləri üç ildə bir dəfə attestasiyadan keçəcəklər və Maliyyə Nazirliyi yanında Dövlət Sığorta Nəzarəti Xidmətinə rüblük hesabatlar təqdim edəcəklər. Trend-in məlumatına görə, bu barədə cümə günü Dövlət Xidmətinin sektor müdiri Mahir Abdullayev Bakıda keçirilən Sığorta Agentlərinin I Milli Forumunda çıxışında deyib.
"Bu məsələlər gündəlikdədir və yaxın vaxtlarda tətbiq ediləcək", - Abdullayev qeyd edib.
Onun sözlərinə görə, hazırda ölkədə 600-dən çox sığorta agenti fəaliyyət göstərir, onlardan 46-sı hüquqi, 597-si isə fiziki şəxsdir.
"Sığorta agenti fəaliyyətinə ilk lisenziyalar "Sığorta fəaliyyəti haqqında" qanunun qüvvəyə minməsi ilə 2009-cu ildən etibarən verilməyə başlanılıb və Azərbaycanda "İcbari sığortanın növləri haqqında" qanun qəbul edildikdən sonra onların sayı 2011-ci ilin sonunda və 2012-ci ildə kəskin artıb. Belə ki, 2009-cu ildə 14 hüquqi, 187 fiziki şəxs, 2010, 2011, 2012-ci illərdə isə müvafiq olaraq 1 və 62, 11 və 108, 20 və 240 şəxs qeydə alınıb", - Abdullayev bildirib.
Sektor müdirinin sözlərinə görə, avtonəqliyyat vasitəsi sahiblərinin mülki məsuliyətinin icbari sığortası üzrə polislərin satışı üçün agentlik fəaliyyətinə yüksək tələbat qalır.
"Sığorta agentlərinin sayında məhdudiyyət yoxdur. Tələbatın artması ilə onların da sayı artacaq", - Abdullayev qeyd edib.