Azərbaycan, Bakı, 10 dekabr /Trend, müxbir A.Axundov/
Azərbaycan assosiativ saziş çərçivəsində Avropa Komissiyası ilə danışıqlar prosesini yeniləyib. Bu barədə bazar ertəsi Trend-ə xarici işlər nazirinin müavini Mahmud Məmməd-Quliyev məlumat verib.
Assosiativ sazişə dörd istiqamət daxildir: siyasi dialoq; təhlükəsizlik, ədliyyə və insan hüquqlarının müdafiəsi məsələləri; iqtisadi və sosial-humanitar məsələlər; ticarət. Danışıqlar bütün bu istiqamətlər üzrə aparılır.
"Biz videokonfransların keçirilməsini yenilədik, artıq onlardan bir neçəsi keçirilib. Biz işi hələ ki, videokonfranslar səviyyəsində davam etdirəcəyik", - Məmməd-Quliyev deyib.
Onun sözlərinə görə, ehtiyac yaranarsa, plenar iclas keçiriləcək.
Məmməd-Quliyevin sözlərinə görə, Azərbaycan üçün Avropa İttifaqı ilə daha uzunmüddətli əməkdaşlıq üzrə ölkənin fəaliyyətinin bütün aspektlərini əks etdirən keyfiyyətli sənəd hazırlamaq çox əhəmiyyətlidir. Buna görə də assosiativ sazişin imzalanmasının mümkün tarixini söyləmək çox çətindir.
