Polşa, Varşava, 2 aprel /Trend, müxbir S.Ağayeva/
Polşa Azərbaycan vasitəsilə Fars körfəzi ölkələri ilə birbaşa nəqliyyat əlaqəsi qurmaq niyyətindədir. Trend-in məlumatına görə, bunu Polşa Baş nazirinin müavini, iqtisadiyyat naziri Yanuş Pexoçinski Varşavada azərbaycanlı jurnalistlərlə görüşdə deyib.
Onun sözlərinə görə, hazırda Azərbaycanda genişmiqyaslı tikinti işləri aparılır: "İnfrastruktur yaradılır, dəmiryolları, metro xətləri və stansiyaları tikilir. Biz Azərbaycan və İran dəmiryollarının birləşəcəyinə ümid edirik. Polşa məhz bu yolla Azərbaycan ərazisi vasitəsilə Fars körfəzi ölkələri ilə nəqliyyat əlaqəsi qura bilər. Biz qlobal maliyyə böhranından sonra Azərbaycanla əməkdaşlığı yeni nəqliyyat dəhlizlərinin formalaşdırılması fonunda nəzərdən keçiririk".
Baş nazirin müavini bildirib ki, Polşa və Azərbaycan hökumətləri gələcəkdə Azərbaycan, Qazaxıstan və Ukrayna dəmiryollarının Avropa ilə birləşdirilməsi məsələsi üzrə danışıqlar aparıblar: "Avropa və Asiya dəmiryolllarının böyük gələcəyi var. Buna görə də biz Azərbaycanın əlverişli coğrafi mövqeyi nəzərə alınmaqla dəmiryolların birgə işlərinin potensialından maksimum istifadə etməliyik. Bundan başqa, bununla əlaqədar Azərbaycan bazarına çıxmaqda maraqlı olan Polşa şirkətlərinin maraqlarını da nəzərə almaq lazımdır".
Y.Pexoçinski buna misal kimi dəmiryol infrastrukturunun istehsalı sahəsində ixtisaslaşan Polşanın TINES şirkətinin adını çəkib.
Onun sözlərinə görə, bundan başqa, Polşanın digər qabaqcıl şirkəti "Solaris" (avtobus istehsalçısı) Azərbaycana 300 avtobus tədarük etmək haqqında danışıqlar aparır: "Həmin avtobuslar 2015-ci il Bakıda keçiriləcək I Avropa Oyunları zamanı istifadə oluna bilər".
İqtisadiyyat naziri qeyd edib ki, dəmiryol vaqonları və tramvay istehsalı ilə məşğul olan daha bir şirkət - PESO-nun da Azərbaycan bazarı üçün xüsusi təklifləri var: "Eyni zamanda, Polşanın tikinti firmaları Azərbaycanda fəaliyyətə başlamağa hazırdırlar".
Onun sözlərinə görə, iki ölkə arasında əməkdaşlığın digər perspektivli istiqamətləri çirkab suların təmizlənməsi, kanalizasiya, su kəmərləri, alternativ enerji, dağ-mədən sənayesində kəşfiyyat, ekologiya və turizmdir: "Polşa tərəfi dağ-mədən sənayesi və nəqliyyat sahələrində azərbaycanlı mütəxəssislərin ali məktəblərdə və müəssisələrdə hazırlıq keçməsini təklif edib".
Y.Pexoçinski bildirib ki, iki ölkə arasında əməkdaşlığın perspektivli istiqamətlərindən biri də kənd təsərrüfatıdır: "Azərbaycanın kənd təsərrüfatının inkişafı üçün böyük potensialı var. Fikrimcə, Azərbaycan kənd təsərrüfatı məhsulları istehsalçılarının birliklərinin təşkili sahəsində Polşanın təcrübəsindən yararlanmalıdır".
O qeyd edib ki, Polşa Azərbaycanın Ümumdünya Ticarət Təşkilatına üzv olması prosesində ölkəyə hər cür dəstək verməyə hazırdır: "Biz bu danışıqlarda Azərbaycanın müttəfiqiyik. İstəyirik ki, bu proses tez bir zamanda başa çatsın".
