Azərbaycan, Bakı, 21 may /Trend, müxbir Z.Qurbanova/
Qiymətli Kağızlar üzrə Dövlət Komitəsi (QKDK) investisiya fondlarına qarşı xüsusi vergitutumu formalarını tətbiq etmək niyyətində deyil. Bunu çərşənbə günü Trend-ə QKDK sədri Rüfət Aslanlı deyib.
Lakin o bildirib ki, qiymətli kağızlar bazarının alətləri özünəməxsusdur: "Onların digər əməliyyatlar, o cümlədən bank əməliyyatları ilə müqayisədə özəllikləri var. Buna görə də özünəməxsus vergi siyasəti və rejimini həyata keçirmək lazımdır".
R.Aslanlı vurğulayıb ki, investisiya fondlarının fəaliyyətinə qarşı xüsusi güzəştlər tətbiq edilməyəcək: "Bu alətlər bazar şəraitində rəqabətədavamlı olmalıdır, buna görə də hesab etmirik ki, hər hansı güzəştlər olmalıdır".
Dünya təcrübəsində investisiya fondlarından vergitutumunun müəyyən özəlliyi var, belə ki, onlar ƏDV-dən azad edilirlər.
QKDK sədri xatırladıb ki, investisiya fondlarının fəaliyyəti üçün icazənin alınması ilə əlaqədar 2 müraciət daxil olub: "Hazırda bu proses hazırlanma mərhələsindədir. Bu şirkətlərin təsisçiləri indiki mərhələdə investisiya siyasəti, daxili infrastruktur kimi bizi maraqlandıran məsələlərə cavab hazırlayırlar".
R.Aslanlı qiymətli kağızlar bazarında bəzi çətinliklərin aradan qaldırılmasının zəruriliyini vurğulayıb: "Bu çətinliklər səbəbindən qeyd edilən bazarda bir əməliyyatdan bir neçə dəfə vergi tutulur. Bu ona görə baş verir ki, qiymətli kağızlar bazarında vergitutumu ümumiləşdirilməyib. Bu çətinlikləri sadələşdirmək lazımdır".