Azərbaycan, Bakı, 7 iyun /Trend, müxbir Z.Qurbanova/
Azərbaycan regionlarından (Bakı istisna olmaqla) bank sisteminə cəlb edilən əhali əmanətləri 2014-cü ilin yanvar-aprel aylarında 508,2 milyon manat və ya bank əmanətlərinin ümumi həcminin 7,7 faizini təşkil edib. Trend-in məlumatına görə, bu barədə Azərbaycan Mərkəzi Bankının (AMB) statistik hesabatında deyilir.
Bakı üzrə bu göstərici 6061,6 milyon manat təşkil edib. Burada milli valyutada əmanətlərın payı 3585,7 milyon manat olub. Ölkə üzrə və Bakı üzrə orta faiz dərəcəsi hesabat dövründə 8,2 faiz təşkil edib.
Bununla da Bakı bankların əhalinin əmanətlərinin cəlb edilməsi göstəricisi üzrə lider olaraq qalır. Əhali depozitlərinin cəlb edilməsi üzrə rayonlar arasında Abşeron iqtisadi rayonu (156,5 milyon manat, orta faiz dərəcəsi illik 8,9 faiz) liderlik edir.
Hesabat dövründə əmanətlərin həcmi Aran iqtisadi rayonu üzrə 158,4 milyon manat (7,8 faiz), Dağlıq Şirvan - 14,9 milyon manat (6,1 faiz), Gəncə-Qazax - 55,6 milyon manat (5,9 faiz), Quba-Xaçmaz - 20,3 milyon manat (6,5 faiz), Lənkəran - 42,1 milyon manat (7,5 faiz), Şəki-Zaqatala - 22,1 milyon manat (5,9 faiz), Yuxarı Qarabağ - 11,5 milyon manat (4,2 faiz), Kəlbəcər-Laçın - 7,5 milyon manat (4,6 faiz), Naxçıvan iqtisadi rayonu üzrə isə 19,2 milyon manat (4,1 faiz) təşkil edib.