Azərbaycan, Bakı, 9 iyun /Trend, müxbir E.Əliyev/
Azərbaycanda qızıl istehsalı ilə məşğul olan "Anglo-Asian Mining PLC" şirkəti "Gədəbəy" qızıl-mis mədənində ehtiyatların qiymətləndirilməsini 29 faiz artırıb. Bu barədə Trend şirkətin saytına istinadən məlumat verir.
Belə ki, şirkət yataqdakı hər tonda 0,73 qram səviyyəsində qızıl tərkibi olan filizin qiymətləndirilməsini 61,8 milyon tonadək artırıb. Beləliklə, indi mədənin ehtiyatları 1,45 milyon unsiya qızıldır.
Məlumatda deyilir: "Qiymətləndirmədə artıma doğru yenidən baxış "Gədəbəy"də qazma işlərinin nəticələrinin yenilənməsi və mədənin şimalında yerləşən yeni "Qadir" strukturunun kəşfi ilə bağlıdır. Kəşfiyyat işlərinin davam etdirilməsi cari ildə əlavə həcmlərin aşkar olunmasına gətirib çıxara bilər".
İlkin qiymətləndirmələrə görə, "Qadir" strukturunun ehtiyatları təxminən 700 min ton filizdir. Filzin hər tonunda qızılın səviyyəsi 6 qramdır.
