Azərbaycan, Bakı, 1 avqust /Trend, müxbir Zülfiyyə Qurbanova/
Azərbaycan Beynəlxalq Bankı (ABB) Fars körfəzi ölkələrinin islam maliyyə bazarları ilə fəal işləməyi planlaşdırır. Bu barədə Trend-ə ABB-nin İslam Bankçılığı Departamentinin direktoru Bəhnam Qurbanzadə bildirib.
Onun sözlərinə görə, ABB daim islam maliyyələşdirməsində maraqlı olan maliyyə institutları ilə əlaqələr qurmağa çalışır ki, bu da öz növbəsində, Azərbaycanda əlverişli investisiya mühiti yaradır.
Departament direktoru qeyd edib ki, bu gün ABB-nin islam maliyyə institutlarından cəlb etdiyi vəsaitlərin ümumi həcmi 218,7 milyon dollar təşkil edir.
Bundan başqa, B.Qurbanzadənin sözlərinə görə, Rusiya banklarının islam bankçılığına marağını nəzərə alaraq, ABB işçi qrupu yaratmağı və RF Mərkəzi Bankına təqdim etmək üçün müvafiq təkliflər paketi hazırlamağı planlaşdırır: "Lakin biz son vaxtlar Rusiya Mərkəzi Bankının ölkədə bank sisteminin sağlamlaşdırılması üzrə aktiv işlər apardığını müşahidə edirik. Həmçinin Mərkəzi Bankın tələblərinə cavab verməyən 30-dan artıq bankın lisenziyası geri çağırılıb və bu proses hələ də davam edir. Hesab edirik ki, islahatlar başa çatdıqdan sonra işçi qrupunun yaradılması və RF Mərkəzi Bankına müvafiq təkliflər paketinin hazırlanması məqsədəuyğun olacaq. ABB-Moskva bu prosesin təşəbbüskarı kimi çıxış edir və bu gün ABB və ABB-Moskva tərəfindən RF-də qanunvericilik bazasının təhlili və islam bankçılığının perspektivləri üzrə iş aparılır".
Azərbaycan Beynəlxalq Bankı islam bankçılığı çərçivəsində xidmətlərin göstərilməsinə ötən ilin aprelindən başlayıb. Bu gün islam maliyyələşdirməsi çərçivəsində aktivlərin ümumi həcmi 180 milyon dollar təşkil edir. ABB-nin İslam Bankçılığı Departamenti korporativ müştərilərə və fiziki şəxslərə xidmətlər göstərir. Bank tərəfindən qanunvericiliyin təkmilləşdirilməsi sahəsində fəal iş aparılır. ABB mütəxəssislərinin və bir sıra nazirlik və dövlət təşkilatlarının nümayəndələrinin daxil olduqları işçi qrupu Azərbaycanda islam bankçılığının tənzimlənməsi üçün təkliflər paketi hazırlayır.