Ölkənin vergi sisteminin təkmilləşdirilməsi ilə bağlı tədbirlər çərçivəsində vergilər nazirliyi İslam ölkələri vergi orqanları Assosiasiyasının işində iştirakı fəallaşdırmaq niyyətindədir. Nazirlikdə Trend ə bildirilib ki, bu, beynəlxalq təcrübə ilə tanışlıq üçün böyük əhəmiyyət kəsb edir.
Nazirliyin əməkdaşları bu günlərdə İranın Dövlət vergi təşkilatının dəvəti ilə assosiasiyanın Tehranda keçirilən ikinci texniki konfransında iştirak edib.
Assosiasiya 2003-cü ilin oktyabrında İslam Konfransı Təşkilatının onuncu toplantısında Malayziya baş nazirinin təşəbbüsü ilə yaradılıb. Belə bir strukturun yaradılmasında əsasə məqsəd islam ölkələrinin vergi orqanları arasında təcrübə mübadiləsi və əlaqələrin dərinləşdirilməsidir.
Assosiasiyanın 17 üzvü vardır. Amma Tehran konfransında daha iki ölkə də qoşulub. Konfransda islam ölkələrində verginin, xüsusilə islam vergilərinin (məsələn zəkat) tətbiqi ilə bağlı təcrübə mübadiləsi aparılıb. Azərbaycanın nümayəndə heyəti tətbiq proseduraları ilə tanış olub.
