İyunun 15-dən sonra "Russkiy Alüminiy" ASC-nin yüksək səviyyədə geniş nümayəndə heyətinin Azərbaycanda aluminium istehsalı zavodunun tikintisi üzrə danışıqları davam etdirmək üçün Bakıya səfəri gözlənilir.
Trend in xəbər verdiyi kimi, bu barədə iyunun 8-də keçirilmiş mətbuat konfransında iqtisadi inkişaf naziri Heydər Babayev məlumat verib. "Zavodun Gəncə yaxınlığında inşası planlaşdırılır. Ancaq bunun "Azəralüminium"la heç bir əlaqəsi yoxdur. Alüminium zavodunun nümayəndələri "RusAl" ilə danışıqlarda iştirak etmir", - deyə nazir qeyd edib.
Danışıqlar prosesində əsas məsələ enerji təchizatı ilə bağlıdır. Çünki alüminium istehsalı böyük həcmdə elektrik enerjisi sərf edir. Elektrik enerji istehsalı üçün isə qaz lazımdır. Buna görə də qazın qiyməti ilə də bağlı müzakirələr aparılacaq. "Adətən sərmayədarlar qazın güzəştli qiymətlə verilməsini istəyir. Ancaq biz indiyədək bu istiqamətdə heç kimə güzəşt etməmişik",- deyə H.Babayev nəzərə çatdırıb.
Zavodun istehsal gücü ildə 300 min ton təşkil edəcək. Zavodun işinin təmin olunması, infrastrukturun genişləndirilməsi və elektrik stansiyasının inşası üçün sərmayənin ümumi həcmi $1 mlrd-ı keçəcək.
