İyunun sonuna qədər Azərbaycan Milli bankının "Millikart" prosessinq mərkəzinin kommersiya banklarının idarəsinə verilməsi ilə bağlı birinci təsis yığıncağı olacaq. Trend in verdiyi xəbərə görə, AMB-nin idarə heyəti sədrinin birinci müavini Alim Quliyev jurnalistlərə bildirib. Yığıncaqdan sonra yeni hüquqi şəxsin yaradılması üzrə sənədlər qeydiyyat üçün Ədliyyə Nazirliyinə təqdim olunacaqlar.
A.Quliyevin sözlərinə görə, mərkəz VB-nin "Azərbaycanın maliyyə sektoruna texniki yardım" layihəsi çərçivəsində yaradılıb, ona görə də bu razılaşma üzrə bankla məsləhətləşmələr aparılıb. Həmçinin AMB dövlət orqanı olduğu üçün "Millikart" mərkəzinin dövlət əmlakı olmasını nəzərə alaraq, dövlət əmlakının idarəsi üzrə Dövlət komitəsindən icazə alınıb. Artıq mərkəzin kommersiya banklarının idarəsinə verilməsi üzrə sazişin bütün hüquqi aspektləri razılaşdırılıb.
Mərkəz 22 bankın idarəsinə veriləcək (6 bankdan ibarət təşəbbüs qrupuna daha 16 bank qoşulub). A.Quliyev onların siyahısına daha bir neçə bankın əlavə olunma ehtimalını istisna etmir. Bu həftə təsisçilərin ümumi yığıncağı olub və qəbul olunmuş qərara əsasən "Millikart" bazasında açıq səhmdar cəmiyyət yaradılacaq. Görüşdə sazişin bütün texniki aspektləri müzakirə olunub.
Banklar bərabər şərtlərlə mərkəzə daxil olacaqlar. Saziş 3,5 milyon yeni manat məbləğində maya dəyəri üzrə həyata keçiriləcək. Onlardan 1,7 milyon manatı VB kreditinin payına, 1,8 milyon manatı isə AMB-nin şəxsi vəsaitlərinin payına düşür.
"Banklar və Milli bank arasındakı razılaşmaya əsasən, mərkəz birinci mərhələdə 2,5 milyon manat kapitalla təsis olunacaq, bunlardan 1,8 milyon manatı AMB-yə qaytarılacaq, qalan 700 min manat isə "Millikart"ın fəaliyyətinin təşkili üçün ilkin kapital qismində istifadə olunacaq", - deyə A.Quliyev qeyd edib. Üç il ərzində mərkəzin kapitalı yeni səhm emissiyası hesabına 3,5 milyon manata qədər artırılacaq.