Milli Depozit Mərkəzi regional fəaliyyətini inkişaf etdirmək üçün İslam İnkişaf Bankı ilə danışıqlar aparır. Trend in xəbər verdiyi kimi, bu barədə bugünkü mətbuat konfransında mərkəzin prezidenti Bəxtiyar Əzizov bildirib. Onun sözlərinə görə, İİB $200 min dəyərində qrant ayırmağı planlaşdırır. Bu vəsait MDM-in filialları üçün lazımi avdanlıqların alınması, proqram təminatı və kadr hazırlığı üçün nəzərdə tutulub.
Bankın texniki yardımı ilə mərkəzin Gəncə və Lənkərandakı regional filialları təchiz olunacaq.
B.Əzizovun fikrincə, Quba və Şəkidə də filial şəbəkəsinin inkişafına elə bu qədər vəsait tələb olunacaq. Onun sözlərinə görə, bu planlar 2006-07-ci illər üçün nəzərdə tutulub. Mərkəzin bütün filialları on-line rejimində işləyəcək və baş serverlə bağlı olacaq.
"Naxçıvanda MDM-in filialı haqqında" əsasnamə 1 mart 2006-cı ildə qüvvəyə minib. Bu filial artıq fəaliyyətə başlayıb və onun yaradılması ilə Naxçıvan səhmdarlarının qiymətli kağızlarla əməliyyatları sadələşdiriləcək. Naxçıvanda yaşayan qiymətli kağız sahiblərinin səhmdarların reyestrindən çıxarış etmək və ya QK ilə digər əməliyyatlar həyata keçirmək üçün paytaxta gəlməsinə artıq ehtiyac olmayacaq.
