Beynəlxalq Valyuta Fondu Azərbaycanın yanacaq-energetika kompleksi üçün vasitəli subsidiyaların azaldılmasında israr edir. BVF-nin Yaxın Şərq və Mərkəzi Asiya ölkələri üzrə departamentinin direktor müavini Vitali Kramarenkonun Trend ə verdiyi məlumata görə, hökumətə açıq subsidiyaların həcmini artırmaq, bazarı liberallaşdırmaq və tədricən gizli subsidiyalaşdırmanı aradan qaldırmaq təklif olunub.
2006-cı ildən təkcə "Azərenerji" SC üçün subsidiyalar saxlanılıb. Maliyyə Nazirliyindən "Trendə" verilən məlumata görə, sabah büdcə gəlirlərinin proqnozunun formalaşdırılması üzrə komissiyanın növbəti iclasında hökumətin vasitəli subsidiyalaşdırma ilə bağlı gələcək siyasəti də nəzərdən keçiriləcək. Gələn il üçün gizli subsidiyaların həcminin azaldılması və ya ləğv edilməsi məsələsinə baxılır.
2006-cı ilin dövlət büdcəsinin proqnozlarına yenidən baxılması nəticəsində "Azərenerji" üçün əlavə subsidiyaların həcmi 103,1 mln. manatdan 438,5 mln manatadək artıb.
Düzəlişin edilməsi zəruriliyi Azərbaycanın Rusiyadan aldığı qazın dəyərinin bahalaşması ilə əlaqədardır. Əvvəlcə qazın satış qiyməti $60 olub. İndi isə Azərbaycan 1 min kub metr qaz üçün Rusiyaya $110 ödəyir.
Vasitəli subsidiyaların hesabına "Azərenerji"nin ARDNŞ-ə, ARDNŞ-in isə dövlət büdcəsinə olan borcları arasında qarşıqılı hesablaşma aparılır.