Azərbaycan, Bakı/ Trend müxbir İ.Xəlilova/ Azərbaycan hökumətinin ölkənin iqtisadi inkişaf perspektivləri üzrə qısa və orta müddətli tapşırıqlarının qiymətləndirilməsi nəticəsində hazırlanmış Staff Report-a BVF-nin Direktorlar Şurasında baxılması və struktur dəyişiklikləri ilə bağlı plan üzrə müzakirələrin tarixi dəyişdirilib. Valyuta fondunun Bakı nümayəndəliyindən verilən məlumata görə, bu tarix əvvəlcə mayın 7-nə nəzərdə tutulsa da, sonaradan ayın 9-na dəyişdirilib.
BVF artıq təsdiq olunduqdan sonra hesabatın çap olunması üçün Azərbaycan Maliyyə Nazirliyi və Milli Bankın razılığını alıb. Maliyyə Nazirliyi hesabatda iki kiçik dəyişiklik edilməsini xahiş edib. Bu dəyişikliklər edildikdən sonra yenilənmiş hesabatın Direktorlar Şurasının hər bir üzvünə təqdim olunması müzakirələrin vaxtının uzadılmasına səbəb olub.
Staff Report tərkibinə həmçinin BVF-nin yaradılması barədə müqavilənin IV maddəsi üzrə 2007-ci ilin fevralında aparılmış Azərbaycanın uyğunluq icmalı da daxil edilib. Bu icmal ildə bir dəfə Valyuta Fonduna üzv olan ölkələrin hər birində aparılır.
Azərbaycanla Valyuta Fondunun iki illik əməkdaşlığı IV maddə üzrə məsləhətləşmələr çərçivəsində aparılır.
