Azərbaycan, Bakı, 02 fevral / Trend / 2007-ci ildə Azərbaycandan boru kəməri nəqliyyatı və dəmir yolu vasitəsilə təxminən 40 mln. ton neft ixrac olunub. Bu barədə Dövlət Gömrük Komitəsindən məlumat verilib.
Bakı-Tbilisi-Ceyhan (BTC) boru kəməri vasitəsilə 2007-ci ildə 27,5 mln. ton neft ixrac edilib. BTC ilə "Azəri-Çıraq-Günəşli" yatağından hasil edilən yüngül neft ixrac olunur. Neft kəmərinin operatoru BP şirkətidir. Yatağın işlənməsi üzrə layihənin yalnız iki iştirakçı xarici şirkəti - Ameriknın ExxonMobil və Devon öz neft paylarını BTC üzrə daşımırlar. Bu şirkətlər BTC-nin tikintisində səhmdar olmayıblar və öz neft paylarını dəmir yolu vasitəsilə Gürcüstanın Batum limanına çatdırır və oradan satırlar.
Komitənin məlumatına görə, 2007-ci ildə Bakı-Novorossiysk boru kəməri ilə 2 mln. ton neft ixrac olunub. Bu boru kəməri ilə, əsasən, Azərbaycan Dövlət Neft Şirkətinin şəxsi vəsaiti hesabına yataqlardan hasil etdiyi neft, həmçinin, xarici iştirak payı ilə birgə müəssisə və əməliyyat şirkətlərinin quru yataqlarından hasil etdikləri xammal daşınır.
Komitədən bildiriblər ki, 2007-ci ildə Bakı-Supsa boru kəməri ilə, təmir işləri idə bağlı olaraq,neft nəql olunmayıb. Bu marşrut üzrə neft ixracı 2006-cı iln sonunda dayandırılıb. Boru kəmərində texniki problemlər aşkar olunub və onun təmiri ilə operator məşğul olur. Boru kəmərinin operatoru BP-dir. Kəmərin işi dayandırılanadək "Azəri-Çıraq-Günəşli" yatağından hasil edilən yüngül neft nəql olunurdu.
Komitənin məlumatında bildirilir ki, dəmir yolu nəqliyyatı ilə 2007-ci ildə 4,4 mln. ton neft ixrac olunub. Gürcüstanın Qara dəniz limanlarına dəmir yolu üzrə yüngül neftlə yanaşı, Amerikanın ExxonMobil və Devon şirkətlərinin "Azəri-Çıraq-Günəşli" yatağından hasil etdikləri neft, Qazaxıstan və Türkmənistandan, Azərbayücandan keçməklə, nəql olunan tranzit xammal daşınır.
