Azərbaycan, Bakı, 22 aprel/ Trend , müxbir A.Bədəlova/ Dünya bazarlarında Amerika dollarının zəifləməsi ikinci rübdə Şimal dənizində hasil edilən Brent etalon neft növünün qiymətinin $125/barelədək artmasına səbəb ola bilər. Bu barədə Trend -a Britaniyanın iqtisadi araşdırmalar üzrə Capital Economics Ltd konsaltinq şirkətinin beynəlxalq iqtisadçısı Hyuqo Navarro (Hugo Navarro) məlumat verib.
Lakin Capital Economics-in iqtisadçısı hesab edir ki, neftin belə yüksək qiymətləri uzun müddət qalmayacaq və artıq 2008-ci ilin sonunda bir barelə görə 30 faiz az ödənə bilər.
"Dollar öz mövqeyini bərpa etməyə başladıqdan dərhal sonra, neft bazarında gərginlik tezliklə zəifləməyə başladıqdan sonra ilin sonunda neftin qiymətləri $85/barelə qayıdacaq", - çərşənbə axşamı Navarro bildirib.
Navarro bildirib ki, Capital Economics-in proqnozlarına görə, 2008-ci ilin sonunda Amerika valyutasının məzənnəsi hazırkı bir avroya görə $1,5933-dan $1,50-dək artacaq.
Bazar ertəsi dünya bazarlarında neftin qiyməti artaraq yeni rekord səviyyəyə - $117/barelə çatıb. Nyu-Yorkun NYMEX birjasında Amerikanın WTI markalı yüngül neftinin may fyuçerslərinin dəyəri 0,79 faiz artaraq $117,48/barelə çatıb.
Londonun İCE birjasında Brent neftinin iyun fyuçerslərinin qiyməti 0,51 faiz artaraq $114,43/barelə çatıb.
Müəlliflə əlaqə saxlamaq üçün elektron ünvan: [email protected]
