Azərbaycan, Bakı, 01 dekabr / Trend , müxbir E.İsmayılov/
Yanvar-oktyabr aylarında "Bakı-Tbilisi-Ceyhan" (ВТС) boru kəməri ilə Türkiyə ərazisindən 240 milyon barelə yaxın neft nəql edilib. Yanvar-sentyabr aylarında bu göstərici 214,5 milyon barelə yaxın olub. Bu barədə Türkiyənin "Botaş" dövlət boru kəməri şirkətinin rəsmi saytında yerləşdirilən məlumatında deyilir.
Oktyabr ayında Türkiyə ərazisindən ВТС ilə təxminən 25,4 milyon barelə yaxın neft nəql olunub. Sentyabr ayında isə bu rəqəm 24,1 milyon barelə yaxın olub.
2008-ci ildə Türkiyə ərazisindən ВТС ilə 264 milyon barel neft nəql olunmuşdu.
ВТС neft kəməri ilə əsasən Azərbaycanın Azeri Light markalı yüngül nefti və kiçik həcmlərdə Qazaxıstanın "Tengiz" yatağından çıxarılan neft nəql olunur.
BTC boru kəmərinin ümumi uzunluğu 1768 kilometrdir. Bunun 443 kilometri Azərbaycan, 249 km-i Gürcüstan, 1076 km-i Türkiyə ərazisindən keçir. Boru kəmərinin tikintisi 2003-cü ildə, onun neftlə doldurulması isə 2005-ci il mayın 18-də başlanıb.
BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz ); Statoil (8,71 faiz ); ТРАО (6,53 faiz ); Eni (5 faiz ); Total (5 faiz ); Itochu (3,40 faiz ); Inpex (2,50 faiz ); ConocoPhillips (2,50 faiz ) və Amerada Hess (2,36 faiz).
Oktyabr ayında "İraq-Türkiyə" kəməri ilə Türkiyə ərazisindən təxminən 11,6 milyon bareldən çox neft nəql edilib. Sentyabr ayında bu göstərici 14,6 milyon bareldən artıq olub. Ümumilikdə, yanvar-oktyabr aylarında bu kəmərlə 124,3 milyon barel neft nəql olunub.
"Ceyhan-Qırıqqala" boru kəməri ilə oktyabr ayında Türkiyə ərazisindən 1,6 milyon bareldən çox neft nəql edilib. Sentyabr ayında bu rəqəm təxminən 2,1 mln bareldən çox olub. Ümumilikdə, yanvar-oktyabr aylarında bu kəmərlə 15,3 milyon bareldən artıq neft nəql olunub.
"Batman-Dördyol" boru kəməri ilə oktyabr ayında 495 min barel neft nəql edilib. Sentyabrda bu rəqəm 1,2 milyon barel neft olub. Ümumilikdə, yanvar-oktyabrda bu kəmərlə təxminən 10,3 milyon barel neft nəql olunub.
Məqalə müəllifi ilə əlaqə ünvanı: [email protected]