...

ARDNŞ Heydər Əliyev adına BNEZ-dəki qurğulardan birinin əsaslı təmirinə hazırlaşır

Energetika Materials 22 İyul 2010 18:06 (UTC +04:00)

Azərbaycan, Bakı, 22 iyul /Trend, müxbir E.İsmayılov/

ARDNŞ yaxın vaxtlarda Heydər Əliyev adına Bakı Neft Emalı Zavodunda (BNEZ) katalitik krekinq qurğusunu əsaslı təmir etmək niyyətindədir. Bu barədə cümə axşamı ARDNŞ-dəki mənbə bildirib.

Onun sözlərinə görə, təmirin aparılması məqsədilə qurğunun işi dayandırılacaq.

ARDNŞ iki zavodunda yerləşən istehsalat qurğularında mütəmadi olaraq planlı təmir işləri aparır. Onlardan biri katalitik krekinq qurğuisudur.

"Bu qurğuda planlı təmir işləri də vaxtaşırı aparılır, lakin cari ildə onun əsaslı təmiri həyata keçiriləcək", - mənbə qeyd edib.

Mənbə bu qurğunun işinin dayandırılması tarixini dəqiq bildirməyib, lakin, onun sözlərinə görə, təmir prosesi çox vaxt aparmayacaq.

Adətən katalitik krekinq qurğusunun dayandırılmasının məhsul istehsalına təsir etməməsi üçün əvvəlcədən hazırlıq işləri görülür. Katalitik krekinq qurğusunda benzin fraksiyası və sıxılmış qaz istehsal olunur.

ARDNŞ-dəki digər mənbənin əvvəlcə dediyinə görə, NEZ-də yenidənqurma işləri çərçivəsində aşağıdakı layihələrin həyata keçirilməsi nəzərdə tutulub:

- benzinə artan tələbatın ödənilməsi çərçivəsində katalitik krekinq qurğusunun istehsalat gücünün iki milyon tondan üç milyon tona çatdırılması, yenidənqurma layihəsinin keyfiyyət göstəricilərinin yaxşılaşdırılması və istismar xərclərinin azaldılması (2010-2012-ci illər) məqsədilə layihənin həyata keçirilməsi planlaşdırılıb.

- ilkin emal qurğusunun (ELOU AVT-6) gücünün artırılması, yanacaq və enerji tələbatının azaldılması (orta hesabla 30%), yenidənqurma layihəsinin istismar xərclərinin azaldılması və keyfiyyət göstəricilərinin yaxşılaşdırılması məqsədilə layihənin həyata keçirilməsi planlaşdırılıb.

- dizel məhsulunun keyfiyyətinin yaxşılaşdırılması üzrə layihənin həyata keçirilməsi planlaşdırılıb (2010-2011-ci illər).

Zavodda istehsalat gücünün artırılmasına, keyfiyyət göstəricilərinin yaxşılaşdırılması və istismar xərclərinin azaldılmasına istiqamətlənən nisbətən kiçik layihələr də planlaşdırılıb.

Azərbaycanda cəmi iki neft emalı zavodu var. Bunlar Heydər Əliyev adına NEZ və "Azneftyağ" NEZ-dir. Birinci NEZ-də əsasən açıq neft məhsulları, ikinci NEZ-də isə tünd neft məhsulları istehsal olunur. Hər iki NEZ-in ümumi həcmi ildə 20 milyon ton neft təşkil edir. Hər iki NEZ quruda və dənizdəki yataqlarda öz vəsaitləri hesabına ildə altı-yeddi milyon ton heft emal edən ARDNŞ-nin tərkibinə daxildir.

Xəbər lenti

Xəbər lenti