Azərbaycan, Bakı, 29 iyul /Trend/
Son dövrlər ARDNŞ-nin "Azərikimya" İstehsalat Birliyinin nəqliyyat infrastrukturunun yenidən qurulmasına və fəaliyyətinin gücləndirilməsinə xüsusi diqqət yetirilməyə başlanılıb. Görülən işlərin real nəticəsi olaraq Birliyin müəssisələrinin maşın parkı mərkəzləşdirilərək genişləndirilib, ağır texnika, yeni maşın və mexanizmlərlə təmin edilib.
Hazırda kimya məhsullarının ixracında mühüm əhəmiyyət kəsb edən dəmiryol şəbəkəsinin əsaslı təmirinə, onun yenidən qurulmasına başlanılıb. İlkin mərhələdə təmir olunacaq 7,3 kilometrlik dəmiryol xəttinin 1 kilometrdən çox hissəsində təmir-bərpa işləri başa çatdırılıb. Relslər boyu təmizləmə işləri aparılaraq yeni şpallar vurulub, relslərin qovşaq hissələrinin etibarlılığı yoxlanılaraq lazımi yerlərdə dəyişdirilib və nizamlanıb. Görülən bütün işlər daxili qüvvələr hesabına - Birliyin müəssisələrinin peşəkar dəmiryolçularının gücü və səyi ilə yerinə yetirilib.
Qeyd etmək lazımdır ki, bütövlükdə kimya müəssisələrinin balansında olan dəmiryol xətləri çox böyük bir şəbəkəni əhatə etsə də, son illər bir sıra istehsalat sahələrinin fəaliyyətlərinin dayandırılması nəticəsində zavodların dalan dəmiryollarının müəyyən hissəsindən istifadəyə ehtiyac qalmayıb. Birliyin mütəxəssisləri tərəfindən dəmiryol sahəsi üzrə aparılmış təftiş və analizlərin, dəqiq hesablamaların müzakirəsi belə bir nəticəyə gəlməyə əsas verib ki, yüklərin daşınmasının ahəngdarlığını və tam həcmini, eləcə də səmərəliliyini təmin etmək məqsədi ilə müəyyən sxem dəyişiklikləri həyata keçirməklə, "Azərikimya" İB üçün ümumi uzunluğu mövcud xətdən 2 dəfə az olan dəmiryol xəttinin bərpa olunması lazımdır.
"Azərikimya" İB-nin dəmiryol strukturunda aparılan geniş təmir işləri yaxın gələcəkdə Birliyin müəssisələrində reallaşdırılması nəzərdə tutulan irimiqyaslı yenidənqurma, mütərəqqi texnologiyaların tətbiqi, müasir istehsalat sahələrinin yaradılması üzrə perspektiv planların həyata keçirilməsi istiqamətində görülən ilkin tədbirlərdən olmaqla yüksək keyfiyyət və səmərəlilik vəd edir.
Birliyin dəmiryol şəbəkəsinin əsaslı təmiri və bərpası üzrə işlərin ilkin mərhələsinin avqustun sonunadək başa çatdırılması nəzərdə tutulub. Təmirin başa çatması ilə Birliyin müəssisələrində istehsal olunan kimyəvi məhsulların dalan dəmiryolları ilə Sumqayıt stansiyasına daşınması və xarici ölkələrə ixracı daha etibarlı, təhlükəsiz, nizamlı xarakter alacaq.
