Azərbaycan, Bakı, 30 dekabr /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) Azərbaycanda Avro-2 və Avro-3 standartlarına uyğun olmayan avtomobillərin istismarının qarşısını almaq üçün inzibati tədbirləri kifayət saymır.
"Buna real baxmaq lazımdır. Bunun inzibati yollarla qarşısını almaq çox çətindir. Burada tədricən həm inzibati, həm də iqtisadi tədbirlər işləməlidir. Avtomobil bazarımızda Avro-2 və Avro-3 standartlarına uyğun mühərrikli maşınlar azdır", - ARDNŞ nümayəndəsi deyib.
ARDNŞ nümayəndəsi iqtisadi tədbirlər kimi xarici ölkələrdə yüksək keyfiyyətli avtomobillərə tətbiq edilən vergi güzəştlərini, eləcə də yanacağın benzindən dizelə dəyişdirilməsini qeyd edib.
2011-ci ildən etibarən ARDNŞ Avro-3 standartına uyğun olan dizel yanacağının istehsalına başlamağı planlaşdırır, 2012-ci ildə isə bu standarta şirkətin istehsal etdiyi avtomobil benzini də uyğun olacaq.
Mənbə vurğulayıb ki, ölkənin benzinə tələbatı böyükdür. Xüsusilə, respublikada istehsal edilən benzin daxili tələbatların ödənilməsinə sərf edilir və Gürcüstana ixrac olunur. Mövsümdən asılı olaraq, müəyyən həcm Mərkəzi Asiya və Əfqanıstana ixrac edilir.
ARDNŞ nümayəndəsi Avro-3 standartına cavab verən dizel yanacağına açıq xarici bazarda tələbatın olduğunu deyib, çünki Azərbaycanda istehsal edilən bu növ neft məhsulunun 1,5 milyon tonu ixrac edilir. Dizel satışı üçün əsas bazarlar Türkiyə, Qara dəniz və qismən də Aralıq dənizi ölkələri bazarıdır. Dizel yanacağından əsasən yük nəqliyyatı və gəmilər istifadə edir.
İyuldan etibarən Azərbaycanda istehsal edilən və ölkəyə idxal edilən avtonqəliyyat vasitələrinə Avro-2 standartı tətbiq edilməyə başlayıb.
