Azərbaycan, Bakı, 27 iyun /Trend/
ARDNŞ prezidenti Rövnəq Abdullayev Trans-Anadolu qaz nəqli sisteminin inşa olunması üzrə sənədlərin imzalanmasını Azərbaycan və Türkiyə arasında enerji münasibətlərinin inkişafında böyük irəliləyiş və "Cənub Qaz Dəhlizi" layihəsinin yaradılmasına verilən real töhfə kimi qiymətləndirib. Bu barədə Trend ARDNŞ-nin rəsmi saytına istinadən məlumat verir.
"Azərbaycan və Türkiyə əl-ələ verərək, həm onlar, həm də bütün Avropa üçün böyük strateji önəm daşıyan bu layihəni birlikdə gerçəkləşdirəcəklər. TANAP Türkiyənin daxili bazarına təbii qazın tədarük olunması üçün, qardaş ölkənin enerji təhlükəsizliyinin təmin olunması üçün müstəsna əhəmiyyət kəsb edən bir layihədir", - Abdullayev deyib.
O qeyd edib ki, eyni zamanda, bu layihə Avropa ölkələrinin enerji təhlükəsizliyinin təminatı baxımından mühüm töhfədir.
"Məlum olduğu kimi, Avropa ölkələrinə qazın hansı yolla nəql olunacağı barədə son qərar 2013-cü ildə veriləcək. Bu günlərdə isə "Şahdəniz" konsorsiumu yataqdan hasil olunacaq təbii qaz həcmlərini Mərkəzi Avropaya təchiz edəcək boru kəmərləri arasında (Nabucco Vest və South East European Pipeline layihələri arasında) seçim edəcək. Seçiləcək variant və TAP (Transadriatik qaz boru kəməri) layihəsi son qərarın çıxarılması prosesində bərabər hüquqda nəzərdən keçiriləcək", - ARDNŞ prezidenti bildirib.
Abdullayevin sözlərinə görə, İstanbulda imzalanmış sənədlər paketi tərəflər arasında razılaşdırılmış qrafikə uyğun hazırlanıb. Həmin qrafikə əsasən, 2011-ci ilin dekabrında tərəflər TANAP üzrə konsorsiumun yaradılmasına dair memorandum imzalamış və layihədəki iştirak paylarını razılaşdırmışdılar. Memorandumda tərəflər həmçinin 2012-ci il iyun ayının sonlarına qədər layihə şirkətinin yaradılması, hökumətlərarası müqavilənin və "TANAP Co" ilə Türkiyə hökuməti arasında müqavilənin (bu sənəddə tərəflərin layihənin icrası üzrə hüquq və vəzifələri öz əksini tapır) imzalanması haqqında razılığa gəlmişdilər. İstanbuldakı imzalanma mərasimi ilə bütün bu məsələlər artıq reallığa çevrilib.
"Qeyd etməliyəm ki, TANAP layihəsi ilə əlaqədar proseslər bütün bu dövrdə Azərbaycan Prezidenti İlham Əliyevin diqqət mərkəzində olub. Dövlətimizin başçısı dəfələrlə işlərin gedişi ilə maraqlanıb, öz rəhbər göstərişlərini bizdən əsirgəməyib. Məhz möhtərəm Prezidentimizin rəhbərliyi altında görülən genişmiqyaslı işlərin nəticəsidir ki, ARDNŞ artıq bu gün boru kəmərinin texniki iqtisadi araşdırmalarının yerinə yetirilməsi istiqamətində addımlar atmaqdadır. Biz bundan sonra da türkiyəli həmkarlarımızla birlikdə əlimizdən gələni edəcəyik ki, TANAP layihəsi "Şahdəniz" yatağının işlənilməsinin 2-ci mərhələsi çərçivəsində təbii qaz hasil olunana qədər həyata keçirilsin", - o deyib.
Onun sözlərinə görə, TANAP layihəsi üzrə sənədlərin Azərbaycan Prezidenti İlham Əliyevin və Türkiyənin Baş naziri Rəcəb Tayyib Ərdoğanın iştirakı ilə imzalanması iki qardaş dövlət tərəfindən Azərbaycan Respublikasının uzunmüddətli perspektiv dövr üçün qaz strategiyasının əsasını təşkil edən Trans-Anadolu Qaz Boru Kəməri layihəsinə verilən müstəsna əhəmiyyətin bariz göstəricisidir.