Bakı. Trend:
Trans-Adriatik boru xətti (TAP) Avropaya enerjin daşıyıcıları tədarükünün təhlükəsizlinin təmin olunması məqsədilə cari buraxılış gücünü mərhələli şəkildə iki dəfə artıra bilər.
Trend-in məlumatına görə, bunu "Azernews"a müsahibəsində TAP-ın icraçı direktoru Luka Skyeppati deyib.
"TAP-ın buraxılış gücünün iki dəfə artırılması layihənin planlaşdırma mərhələsində nəzərdə tutulmuşdu. TAP-ın cari gücü ildə 20 milyard kubmetrə çata bilər. Xəttin genişləndirilməsi imkanları müntəzəm bazar sınaqlarının açıq, şəffaf şəkildə və ayrı-seçkilik olmadan keçirilməsi yolu ilə təklif edilir. Bir sözlə, TAP maraqlı tərəflərə infrastruktur gücünün uzunmüddətli artırılması ilə bağlı müraciətlərini vermək imkanını təqdim edir", - deyə o bildirib.
L.Skyeppati bildirib ki, hazırda 2021-ci ildə elan olunmuş bazar sınağı keçirilir.
"Bazar sınaqlarının birinci mərhələsinin 2022-ci ilin noyabrında, daha sonra ikinci mərhələnin 2023-cü ildə keçirilməsi nəzərdə tutulur. Bazar tələbinin yaranacağı və genişlənmənin iqtisadi səmərəli olacağı təqdirdə TAP əlavə kompressorlar quraşdırmaqla nəql gücünü iki dəfə artıra bilər", - L.Skyeppati deyib.
(Tərcümə: Orxan Nəbiyev)