2005-ci ildə Bakıda 108 mindən artıq qaz sayğacı quraşdırılıb. Bu barədə Trend ə "Bakqaz" İB-dən (Azəriqaz QSC-in strukturu) məlumat verilib. İlin sonuna kimi bu rəqəmin 120 minə çatdırılması nəzərdə tutulub.
Ümumilikdə Azəriqaz cari ildə respublikada 220 min ədəd sayğac quraşdırmaq niyyətindədir. Bu işləri dekabrın 20-nə kimi başa çatdırmaq planlaşdırılır. Bu vaxta kimi Azərbaycanda 150 mindən artıq sayğac quraşdırılıb.
2006-cı ildə Azəriqaz təxminən 500 min sayğac quraşdırmaq niyyətindədir.
Qaz sayğacları Nazirlər Kabinetinin 8 fevral 2005-ci il tarixli 43 saylı sərəncamının həyata keçirilməsi çərçivəsində alınır.
Podratçı "Sənayecihaz" Azəriqazı G-2,5 markalı 50 min və G-4 markalı 40 min ədəd sayğacla təmin edir. Şirkət $1,790 mln məbləğində sayğac tədarük etməyi təklif edib.
Tezliklə Belarusun Belamo şirkəti də Azəriqaza bir partiya G-6 markalı qaz sayğacı tədarük edəcək. Müqaviləyə əsasən, şirkət QSC-ni 30 min ədəd sayğacla təmin edəcək. Müqavilənin dəyəri $840 mindir.