Bakı-Tbilisi-Ceyhan layihəsinin operatoru "BP Azerbaijan" kəmərin nəqletmə imkanını artırmağı nəzərdən keçirir. Bu barədə, Trend agentliyinin məlumatına əsasən, şirkətin prezidenti Devid Vudvord bildirib. Onun sözlərinə görə, bu, Qazaxıstan neftinin nəqli üçün lazımdır.
D.Vudvord deyib ki, kimyəvi reagentlərin istifadəsilə hazırda 1 mln barel təşkil edən kəmərin nəqletmə imkanı 300-400 min barel artırıla bilər. Nasos stansiyalarında aparılan işlərin nəticəsində nəqletmə daha 400 min barel artırıla bilər.
Lakin şirkətin prezidenti qeyd edib ki, "Kaşaqan" yatağında hasilat 2009-2010-cu ildən tez başlamayacaq. Hazırda bu layihədə iştirak edən və BTC-də paya malik olan şirkətlər Azərbaycan və Qazaxıstanla danışıqlar aparacaq ki, bundan sonra tranzit sazişi bağlanacaq.
Bu saziş Xəzər vasitəsilə neft nəqlinin marşrutunu və bu məqsədlər üçün əlavə infrastrukturun yaradılmasına olan ehtiyacı müəyyənləşdirəcək. Belə infrastrukturun yaraldılması üçün sazişin imzalanmasından sonra daha 3-4 il tələb olunacaq.
