Azərbaycan, Bakı, 09 noyabr / Trend , müxbir Ü.İsmayılova /
Bu gün Bakıda Rabitə və İnformasiya Texnologiyaları Nazirliyində Azərbaycan-Sloveniya hökumətlərarası komissiya çərçivəsində telekommunikasiya şirkətlərinin görüşü keçirilib. Görüş zamanı IT sahəsində aparıcı texnologiyalar və yeniliklər üzrə fikir mübadiləsi aparılıb, əməkdaşlıq perspektivləri müzakirə olunub.
"Qlobal maliyyə böhranına baxmayaraq, biz Azərbaycanda nümayəndəliyimizi açdıq və ölkənin iqtisadiyyatına sərmayə yatırmağı gələcəkdə də davam etdirmək niyyətindəyik", - Sloveniyanın Iskratel d.o.o şirkətinin nümayəndəsi qeyd edib.
Onun sözlərinə əsasən, Azərbaycan qlobal maliyyə böhranının demək olar ki, müşahidə edilmədiyi üç ölkədən biridir və bu göstərici ölkənin ümumi inkişafına təsir göstərəcək.
Şirkət artıq Azərbaycanda müasir IT texnologiyalarının tətbiqi üzrə bir sıra layihələrin həyata keçirilməsinə başlayıb və yaxşı nəticələr müşahidə olunur.
Dəyirmi masa zamanı Sloveniyanın "Hermes Softlab", "Infotehna", "Globtel d.o.o.", "Robotina Ltd.", "Softnet d.o.o.", "Najdi.si" şirkətlərinin nümayəndələri iştirak ediblər.
Məqalə müəllifi ilə əlaqə ünvanı: [email protected]