Azərbaycan, Bakı, 11 oktyabr /Trend, müxbir H.Vəliyev/
Azərbaycan Mədəniyyət və Turizm Nazirliyi Sumqayıt şəhərinin 20 mərkəzləşdirilmiş kitabxana sisteminin direktorları (MKS) üçün informasiya texnologiyalarının istifadəsi üzrə treninqlər təşkil edib. Bu barədə bazar ertəsi nazirlikdən verilən məlumatda deyilir.
Məlumata görə, informasiya texnologiyalarının tətbiqi və istifadəsi sahəsində ixtisasartırma üzrə treninqlər oktyabrın 5-dən 9-dək Sumqayıtın İnformasiya Texnologiyaları Akademiyasında keçirilib.
Növbəti treninqlər oktyabrın 12-16-da Lənkəran, oktyabrın 26-30-da isə Gəncədə keçiriləcək.
Bu gün Mədəniyyət və Turizm Nazirliyi tərəfindən kitabxana informasiya sisteminin avtomatlaşdırılması və regional kitabxanaların elektron resurslarının yaradılması layihəsi həyata keçirilir. İnternet-resursların yaradılması işləri Xaçmaz, Bərdə, Quba, Beyləqan, Ağdaş, Neftçala, Gəncə, Mingəçevir, Zərdab və digər rayonların mərkəzi kitabxanalarında artıq başa çatıb.
İşlər Azərbaycan Prezidenti İlham Əliyevin 2008-ci il oktyabrın 6-da təsdiq etdiyi "Azərbaycan Respublikasında kitabxana-informasiya sahəsinin 2008-2013-cü illərdə inkişafı üzrə Dövlət Proqramı" çərçivəsində aparılır.