Azərbaycan, Bakı, 23 noyabr /Trend, müxbir H.Vəliyev/
Azərbaycanın Rabitə və İnformasiya Texnologiyaları Nazirliyi respublikanın mobil rabitə operatorlarına rouminq tariflərinin mərhələli azaldılmasının bir neçə variantını təklif edib.Bu barədə nazirliyin maliyyə, uçot və iqtisadi analiz şöbəsinin rəhbəri Rəşad Nəbiyev çərşənbə axşamı bildirib.
Nəbiyevin sözlərinə görə,operatorlara MDB ölkələri üçün tariflərin azaldılmasına başlamaq təklif olunub. Öz növbəsində, operatorlar operatorlararası birləşmələrin nizamlanmasına başlamağı məqsədəuyğun hesab ediblər.
"Onların təsdiqləmələrinə görə, MDB ölkələrində bu və ya digər xidmətlər üzrə razılaşma əldə etməyin çox asan və çox mürəkkəb olduğu operatorlar var. Avropada uğurun rəhni təkcə istifadəçilər üçün son tariflərin nizamlanması deyil, həm də operatorlararası birləşmələr faktıdır. Biz hesab edirik ki, MDB ölkələrində belə qarşılıqlı fəaliyyət və müvafiq olaraq mexanizmlərin tənzimlənməsi təəssüf ki, yoxdur. Buna baxmayaraq, məhz MDB rouminq tariflərinin səmərəli nizamlanması üçün çox işlər görməyin mümkün olmasına əsaslanaraq, elə həmin platforma kimi xidmət göstərə bilər", - Nəbiyev bildirib.
Onun sözlərinə görə, Rusiya və Qazaxıstanın rabitə administrasiyaları arasında müəyyən dərəcədə ümumi dil tapmağa nail olublar və onlar operatorlar arasında mümkün uğura nail olmaq üçün qarşılıqlı fəaliyyətə başlayıblar.
"Azərbaycanın rabitə administrasiyası Regional Rabitə Əməkdaşlığı (RRƏ) çərçivəsində başlanan işi davam etdirməyi təklif edir və bizim fikrimizcə, buna Dövlətlərarası Antiinhisar Siyasəti Şurasını cəlb etmək və ən qısa vaxt ərzində rouminq tariflərinin qarşılıqlı tənzimlənməsi üzrə konkret təklifin işlənib hazırlanması yerinə düşərdi", - Nəbiyev bildirib.
Noyabrın 19-da keçirilən MDB hökumət başçıları şurasının iclasında MDB iştirakçısı olan dövlətlərin antiinhisar orqanlarına rabitə və beynəlxalq rouminq bazarında antiinhisar qanunvericiliyinin pozuntularının birgə araşdırılması prosedurunun başa çatdırılması və konkret təklif işləyib hazırlanması tövsiyyə edilib.
Azərbaycanın Rabitə və İnformasiya Texnologiyaları Nazirliyi çərşənbə axşamı Bakıda keçirilən RRƏ rabitə administrasiyaları rəhbərlərinin 43-cü iclasında redaksiya komissiyasına bu məsələ ilə bağlı qərar işləyib hazırlamağı və onu RRƏ rabitə administrasiyaları rəhbərlərinə təqdim etməyi təklif edib.
Azərbaycanın Rabitə Nazirliyi Azərbaycanın mobil rabitə operatorlarının xidmət göstərdikləri beynəlxalq rouminq tariflərini Avropada tətbiq olunan analoji xidmətlərin tarifləri ilə müqayisə edib.
Aydın olub ki, Rusiya və ya digər qonşu ölkədə olan Azərbaycan vətəndaşı məsələn, bu göstəricinin orta hesabla 2,5 dollara yaxın olduğu Yunanıstandan zəng vuran İspaniya vətəndaşına nisbətən orta hesabla beş-altı dəfə çox vəsait ödəməyə məcburdur.
Avropada rouminq tarifləri dövlət tərəfindən tənzimlənir və Aİ 2009-cu ildən başlayaraq, rouminq tariflərinə müəyyən məhdudiyyətlər qoyub. Belə ki, Aİ-nin ərazisində olan ölkənin hüdudlarından kənarda edilən mobil zəngin dəyəri 43 avrosentə, qəbul edilən zəngin qiyməti isə 19 sentə yaxındır.
Avropada rouminq tariflərinin tənzimlənməsi ideyası 2002-ci ildə ortaya çıxıb və bütün dövr ərzində operatorlar, ölkə parlamenti, Avropa Komissiyasının tənzimləyiciləri qiymətlərin nizamlanmasının həyata keçiriləcəyi prosedurları işləyib hazırlayıblar.
Bir çox mütəxəssislərin fikirlərinə görə, Aİ-nin tariflərin nizamlanmasını tətbiq etməsi avropalı operatorların qeyri-Avropa ölkələri, eləcə də MDB ölkələrinin operatorları üçün rouminq tariflərinin dərəcələrini artırmasına gətirib çıxarıb.
