2006-cı ildə Azərbaycan Rabitə və İnformasiya Texnologiyaları Nazirliyi 280594 telefon nömrəsini istismara verib, bu isə 2005-ci ildən 116409 nömrə çoxdur. Bu barədə Trend ə çərşənbə axşamı nazirlikdən məlumat verilib.
Ümumi istismara verilmiş nömrələrdən 179092 nömrə Bakı Telefon Rabitəsi İstehsalat Birliyinin (BTRİB), 101502 nömrə isə - Aztelekom İB-nin payına düşüb.
Bu dövr ərzində investisiyalar 41 mln. manatı ötüb və rabitə obyektlərinin yenidən qurulmasına, yeni telefon xətlərinin tikintisinə yönəldilib.
Aztelekom İB Bakı və Naxçıvan Muxtar Respublikası da daxil olmaqla, bütün respublika ərazisində beynəlxalq və şəhərlərarası telefon əlaqəsini təmin edir, beynəlxalq əlaqənin yeganə operatoru olaraq, təbii inhisarçıdır. 54 telekommunikasiya müəssisəsi, Bakı Şəhərlərarası Telefon Qovşağı, Kabel Magistral Texniki Qovşaq və Təmir-Tikinti İdarəsi onun tabeçiliyindədir.
BTRİB Bakı şəhəri ərazisində dövlət müəssisələri və idarə orqanlarına, müəssisə və təşkilatlara, eləcə də xarici hüquqi şəxslərə bütün telefon və radio əlaqəsi xidmətlərini göstərir. Ora 9 telekommunikasiya müəssisəsi, Rabitə qurğularının tikinti və təmir idarəsi və Azərrabitəlayihə layihə - kəşfiyyat kontoru daxildir.