Azərbaycan, Bakı /müx. Trend S.Babaeva/ Bakıya səfərə gələn İsrailin informasiya texnologiyaları şirkətlərindən ibarət nümayəndə heyəti "Azərcell" və "Aztelekom"da görüşər keçirib.
İsrailin Azərbaycandakı səfirliyindən verilən məlumata görə, görüş zamanı İsrail şirkətləri öz məhsullarını təklif ediblər. "Aztelekom"un diqqətini video-konfrans rabitəsi xidməti çəkib.
"Azərcell"də isə əməkdaşlıq imkanlarına dair müzakirələr keçirilib.
İsrailin nümayəndə heyəti doqquz nəfərdən ibarətdir. Heyətə İsrailin İxrac və beynəlxalq əməkdaşlıq (The Israel Export and International Cooperation Institute) institunun biznesin inkişafı üzrə meneceri Korin Rotari (Corin Rotary) başçılıq edir.
Bu gün İsrail şirkətlərinin iştirakı ilə informasiya texnologiyaları üzrə birinci Azərbaycan-İsrail biznes-forumu keçirilir. Buraya Azərbaycanın informasiya texnologiyaları sahəsində çalışan 30-dək orta və kiçik müəssisələri dəvət olunub.