Azərbaycan, Bakı 10 yanvar / "Trend , müxbir D.Xatınoğlu/ İranda tətbiq olunan ölün cəzasının növləri hüquq müdafiəçilərini narahat edir. "Iranda tətbiq olunan ölüm cəzasının növləri vəhşiliyin ən son həddidir" - deyə İranın Böhran Komitəsinin baş katibi, hüquq müdafiəçisi Əmirhüseyn Müvəhhidi bildirib.
BBC-nin yeni ilin ilk günlərində verdiyi məlumata əsasən, 2008-ci il İranda 13 nəfərin edamı ilə başlanıb, bundan əlavə, Zahidan şəhərində İnqilab Məhkəməsinin beş nəfərin sağ qolunun və sol ayağının kəsilməsinə dair çıxardığı qərar icra olunub. Qeyri-rəsmi məlumata əsasən, İran məhkəməsi daha 2 nəfəri "dağdan atmaq yolu ilə edam etmək" cəzasına məhkum edib.
Müvəhhidi cümə axşamı İranın Təbriz şəhərindən telefonla Trend ə açıqlamasında 2 nəfərin "dağdan atılmaqla edam olunmaq" cəzasının doğru olduğunu təsdiq edərək, bildirib ki, bu növ cəzalar insanlığa sığmazdır: "İranda insan haqlarının pozulması hallarının böhran nöqtəsinə yetişdiyini göstərir və beynəlxalq təşkilatlar rəsmi Tehrana reakiya göstərməlidir" - deyə hüquq müdafiəçisi bildirib.
İranlı hüquqşünas və vəkil Məhəmmədrza Fəqihi isə bugün Trend ə telefonla açıqlamasında bildirib ki, "sağ əl və sol ayağın kəsilməsi" və "dağdan atmaq" kimi cəza növləri İranın cinayət məcəlləsinin maddələrində yer alıb və bir növ islami cəzadır. "Bu cəza növü islam dini və inqilaba qarşı duran insanlara tətbiq olunur" - deyə Fəqihi bildirib.
