Bakı. Trend:
Nazirlər Kabinetinin vahid məktəbli forması ilə bağlı qəbul etdiyi qərar təhsil sisteminin təşkili, məktəb mühitində nizam-intizamın və bərabərlik prinsipinin təmin olunması baxımından olduqca əhəmiyyətlidir.
Bunu Trend-ə açıqlamasında Nəsimi adına Dilçilik İnstitutunun Türk dilləri şöbəsinin baş elmi işçisi, filologiya elmləri doktoru, dosent Şəbnəm Həsənli-Qəribova deyib.
Onun sözlərinə görə, vahid məktəbli formasının tətbiqi şagirdlər arasında sosial-iqtisadi fərqlərin nümayişinin qarşısının alınmasına, kollektivə mənsubiyyət hissinin gücləndirilməsinə və sağlam təhsil mühitinin yaradılmasına xidmət edə bilər.
“Təbii ki, cəmiyyətin müxtəlif təbəqələrinin bu məsələyə fərqli yanaşmaları və baxışları ola bilər. Lakin hesab edirəm ki, qəbul edilmiş qərarın mahiyyətini və qarşıya qoyulan məqsədləri nəzərə alaraq məsələyə, ilk növbədə, tədrisin təşkili və təlim-tərbiyə prosesinin səmərəliliyi baxımından yanaşmaq daha məqsədəuyğundur”, – deyə Şəbnəm Həsənli-Qəribova bildirib.
Xatırladaq ki, Baş nazir Əli Əsədov Nazirlər Kabinetinin 2022-ci il 17 mart tarixli 96 nömrəli Qərarı ilə təsdiq edilmiş "Dövlət ümumi təhsil müəssisəsi təhsilalanlarının geyim formalarının təsvirləri"ndə dəyişiklik edilməsi haqqında Qərar imzalayıb.
Qərara əsasən, “Dövlət ümumi təhsil müəssisəsi təhsilalanlarının
geyim formalarının təsvirləri”ndə aşağıdakı dəyişikliklər
ediləcək:
- Təhsilalanların müəyyən edilmiş geyim formasının vahidliyini
pozan, habelə ümumi təhsilin dünyəvilik prinsipinə uyğun olmayan
digər geyim elementlərindən istifadə edilməsinə yol verilmir.
- Azərbaycan xalqının tarixi, mədəniyyəti və milli-mənəvi
dəyərləri ilə bağlı keçirilən tədbirlərdə məktəbin Pedaqoji
Şurasının qərarı ilə milli geyimlərdən və ya milli geyim
elementlərindən istifadə edilməsinə yol verilir.
- Valideynlər və ya digər qanuni nümayəndələr övladları
(qəyyumluğunda və ya himayəsində olan şəxslər) tərəfindən geyim
forması ilə bağlı tələblərə riayət olunmasını təmin
etməlidirlər.
