Bakı. Trend:
Oktyabrın 5-i, bazar ertəsi Donald Tramp aralıq seçkilərində yenidən seçilməyə namizəd olan respublikaçı senator Pit Rikettsi dəstəkləmək üçün Nebraska ştatının Qrand-Aylend şəhərinə səfər edib. Seçkiqabağı mitinqdən sonra Ağ Evin rəhbəri həmişəki kimi bir neçə rəqs hərəkəti edib, daha sonra isə kostyumunun pencəyini açıb.
Məhz bu adi jest fotoqraflara onun geyiminin üzərindəki “Jos. A. Bank” etiketini lentə almağa imkan verib. Bu, ucuz kostyumları ilə tanınan Amerika kişi geyimləri brendidir, lakin onun məhsulları əsasən xarici ölkələrdə istehsal olunur. İqtisadi siyasətinin əsasını “America First” (“Əvvəlcə Amerika”) şüarı və istehsalın ABŞ-a qaytarılması təşkil edən bir prezidentin belə geyim seçimi suallar doğurur.
X sosial şəbəkəsində kişi modası üzrə ixtisaslaşmış amerikalı jurnalist Derek Qay bu ziddiyyətə dərhal diqqət çəkib. “Jos. A. Bank kostyumlarının hamısı xaricdə, adətən Çin və Banqladeş kimi ölkələrdə istehsal olunur”, – deyə o vurğulayıb. Daha sonra isə sual edib: “Görəsən, Tramp niyə ABŞ-da istehsal olunan kostyum əvəzinə xaricdən gətirilən ucuz kostyuma üstünlük verib?”
Bununla belə, Jos. A. Bank brendinin ana şirkəti olan Tailored Brands ABŞ ərazisində də istehsal imkanlarına malikdir. Xüsusilə, şirkətin Joseph Abboud brendi üzrə istehsal müəssisələri var. Lakin həmin brendin etiketi prezidentin pencəyində görünən etiketdən fərqlənir.
Amerikanın HuffPost nəşrinin məlumatına görə, iyulun 10-da ABŞ Qiymətli Kağızlar və Birjalar Komissiyasına (SEC) təqdim edilmiş rəsmi sənəddə Tailored Brands şirkətinin “əsasən Asiyada yerləşən qlobal təchizatçılar şəbəkəsinə” əsaslandığı təsdiqlənir. Təchizatçı ölkələr arasında Vyetnam, İndoneziya, Banqladeş və Çin var.
Bununla yanaşı, şirkət 2024-cü ildə Çindən tədarük həcmini 20 faiz, 2025-ci ildə isə daha 11 faiz azaltdığını bildirir. Donald Trampın geyindiyi kostyumun konkret hansı ölkədə istehsal edildiyi müəyyənləşdirilməsə də, onun seçimi yerli istehsala üstünlük vermək niyyəti ilə ziddiyyət təşkil edir.
Derek Qay, həmçinin ABŞ prezidentinin 2025-ci ilin yanvarında keçirilən andiçmə mərasimindəki çıxışını xatırladıb. Həmin vaxt Donald Tramp belə demişdi: “Məhsullarımızı istehsal edən, şirkətlərimizi ələ keçirən və iş yerlərimizi məhv edən digər ölkələrin törətdiyi fəsadlardan sərhədlərimizi qorumalıyıq”. O, “qorunmanın böyük rifaha və böyük gücə aparacağını” vəd etmişdi.
Ağ Evə qayıtdıqdan sonra respublikaçı siyasətçi şirkətləri istehsalı ABŞ-a qaytarmağa təşviq etmək məqsədilə gömrük rüsumlarını dəfələrlə artırıb.
Prezidentin kostyumunun mənşəyi ilə yanaşı, onun qiyməti də təəccüb doğurub. CNN-in məlumatına görə, fotoşəkillərdə görünən etiket Jos. A. Bank brendinin “Traveler” kolleksiyasına aid etiketi xatırladır. Bu kolleksiyaya daxil olan modellərdən biri təxminən 280 dollara satılır.
Bu məbləğ Donald Trampın adətən əlaqələndirildiyi İtaliyanın dəbdəbəli Brioni brendinin qiymətləri ilə müqayisədə xeyli aşağıdır. Həmin brendin bir kostyumunun qiyməti 5 500 dolları keçə bilər.
Bununla belə, bu seçim siyasi baxımdan müəyyən üstünlük də yarada bilər. CNN-in qeyd etdiyi kimi, yaşayış xərclərinin artması ilə üzləşən amerikalılar prezidentlərinin dəbdəbəli brendlərdən uzaq, geniş ictimaiyyət üçün əlçatan qiymətə satılan kostyum geyinməsini müsbət qarşılaya bilərlər.
Bu, milyarderin özü əhalinin alıcılıq qabiliyyətinin azalması ilə bağlı çətinliklərlə üzləşməsə də, seçicilərinin gündəlik həyatına daha yaxın görünməsinə imkan verə bilər.
