Ağdam. Trend:
Bu gün Ağdamda III Beynəlxalq Xankəndi Ultramarafonunun dördüncü və sonuncu mərhələsinə start verilib.
Trend-in Qarabağ bürosu xəbər verir ki, Azərbaycan Gənclər və İdman Nazirliyi, Azərbaycan Atletika Federasiyası və Bakı Şəhər Halqası Əməliyyat Şirkətinin birgə təşkilatçılığı ilə keçirilən yarışda 6 ölkədən 97 atlet iştirak edir.
Sonuncu mərhələdə atletlər Ağdamdan Xankəndiyə qədər 29,2 kilometr məsafə qət edəcəklər. Bununla da iştirakçılar dörd gün ərzində ümumilikdə 192 kilometr qaçaraq Xankəndidə finiş xəttinə çatacaqlar.
Qeyd edək ki, ultramarafon dörd mərhələdən ibarətdir. İlk mərhələdə iştirakçılar Qəbələ–Ağdaş marşrutu üzrə 52,5 kilometr, ikinci mərhələdə Ağdaş–Bərdə marşrutu üzrə 63,5 kilometr, üçüncü mərhələdə Bərdə–Ağdam marşrutu üzrə 46,8 kilometr, sonuncu mərhələdə isə Ağdam–Xankəndi marşrutu üzrə 29,2 kilometr məsafə qət edirlər.
Hər mərhələnin qalibləri ayrıca mükafatlandırılır. Yarışın yekununda isə ümumi nəticələrə əsasən qaliblər müəyyənləşdirilərək baş mükafata layiq görüləcəklər.
İlk üç mərhələnin nəticələrinə əsasən, kişilər arasında Gürcüstan təmsilçisi David Xarazişvili, qadınlar arasında isə Ukrayna təmsilçisi Olena Şevçenko birinci olub.
Ultramarafonun əsas məqsədi sağlam həyat tərzini və qaçış idmanını təşviq etmək, həmçinin Azərbaycanın müxtəlif bölgələrini idman vasitəsilə tanıtmaqdır.
Xatırladaq ki, Xankəndi Ultramarafonu ilk dəfə 2024-cü ildə Xankəndi–Bakı marşrutu üzrə təşkil olunub. Həmin yarışda dörd ölkədən 64 atlet iştirak edib və ümumilikdə 380 kilometr məsafə qət edilib.
2025-ci ildə isə ultramarafon Qəbələ–Xankəndi marşrutu üzrə keçirilib. Yarışda altı ölkəni təmsil edən 81 atlet mübarizə aparıb.
