Bakı. Trend:
Almaniyanın ən böyük maliyyə institutu olan "Deutsche Bank" bankının rəhbəri Kristian Zevinq ölkə rəhbərliyini bürokratiyanın kəskin şəkildə azaldılmasına, işdən çıxarılmadan müdafiə sisteminin islahatına və xarici investorlar üçün sabit şəraitin təmin edilməsinə çağırıb.
Bu barədə Kristian Zevinq "Bild am Sonntag" qəzetinə müsahibəsində deyib.
O, Almaniya Federativ Respublikası hökumətinin hazırkı islahat tempinin yetərli olmadığını bildirib.
“Bürokratiyanı əhəmiyyətli dərəcədə azaltmalıyıq. Etimad prinsipinə qayıtmaq və belə bir qayda tətbiq etmək lazımdır: əgər mən müraciət edirəmsə və üç-dörd ay ərzində ona cavab verilmirsə, müraciət avtomatik olaraq təsdiqlənmiş hesab olunmalıdır. Belə addımlar artıq indi atılmalıdır. Qorxuram ki, hamımız üçün, əlbəttə, çox dəyərli olan bir məsələyə — işdən çıxarılmadan müdafiəyə yenidən baxmalı olacağıq”, — deyə o bildirib.
Ekspert Almaniya biznesinin sürətlə dəyişən qlobal şəraitə uyğunlaşmasına mane olan əsas amillərdən biri kimi sərt əmək qanunvericiliyini, xüsusilə də işçilərin işdən çıxarılmadan müdafiəsi mexanizmlərini göstərib. O qeyd edib ki, ilk addım olaraq illik gəliri 180 min avrodan çox olan yüksək maaşlı işçilər üçün bu təminatların məhdudlaşdırılması qərara alınıb. Lakin onun sözlərinə görə, bu həddi daha da aşağı salmaq lazımdır.
