Bakı. Trend:
Sudanın Kordofan bölgəsində rəqib hərbi fraksiyalar arasında gedən döyüşlərdə həyata keçirilən dron hücumlarında azı 104 dinc sakin həlak olub.
Trend bu barədə xarici KİV-ə istinadən xəbər verir.
Məlumata görə, dron hücumlarında Cənubi Kordofanın Kaloqi şəhərində yerləşən uşaq bağçası və xəstəxana da hədəf alınıb. Burada 89 nəfər, o cümlədən 43 uşaq və 8 qadın həlak olub.
BMT-nin insan hüquqları üzrə ali komissarı Volker Türk döyüşlərin daha da intensivləşməsindən “dərin narahatlıq” keçirdiyini bildirib və tibbi müəssisələrin hədəfə alınmasının beynəlxalq humanitar hüququ pozduğunu vurğulayıb.
Mərkəzi bölgədə silahlı toqquşmalar Çevik Dəstək Qüvvələrinin (RSF) Babnusa şəhərindəki strateji əhəmiyyətli hərbi bazanı ələ keçirməsindən sonra kəskinləşib.
Gərginliyin artması on minlərlə insanın didərgin düşməsinə səbəb olub və artıq vəba və denqe qızdırması epidemiyaları ilə yüklənmiş səhiyyə müəssisələrini çətin durumda qoyub.