Bakı. Trend:
ABŞ hərbi münaqişə səbəbindən Hörmüz boğazında ilişib qalan gəmiləri müşayiət etmək üçün 4 may səhər saatlarından "Project Freedom" ("Azadlıq Layihəsi") əməliyyatına başlamağı planlaşdırır.
Trend-in məlumatına görə, bu barədə ABŞ prezidenti Donald Tramp "Truth Social" sosial şəbəkəsində yazıb.
O, bir çox ölkənin Hörmüz boğazında blokadaya məruz qalan ticarət gəmiləri ilə bağlı narahatlıqlarını ifadə etdiyini qeyd edib.
"Mən nümayəndələrimə gəmilərinin və heyətlərinin boğazdan təhlükəsiz şəkildə çıxarılmasını təmin etmək üçün bütün səylərimizi göstərəcəyimizi bildirmələrini tapşırdım. Onlar ərazi gəmiçilik və digər məsələlər üçün təhlükəsiz olana qədər heç bir halda geri qayıtmayacaqlarını bildiriblər. "Project Freedom" adlandırılan əməliyyat bazar ertəsi səhəri Yaxın Şərq vaxtı ilə başlayacaq", - deyə o qeyd edib.
O bildirib ki, bu, ABŞ, Yaxın Şərq ölkələri və xüsusilə İran tərəfindən edilən humanitar bir jestdir.