Bakı. Trend:
Kolumbiyanın vəzifəsini başa vuran prezidenti Qustavo Petro bazar ertəsi bildirib ki, onun varisi Abelardo de la Esprielyanın hakimiyyətə gəlməsindən sonra ölkədə vətəndaş müharibəsi təhlükəsi yarana bilər. Petro iddia edir ki, yeni prezident seçkilərdə saxtakarlıq yolu ilə qalib gəlib və onu ABŞ-yə ekstradisiya etdirmək niyyətindədir.
Solçu lider mətbuat konfransında çıxışı zamanı bildirib: "Biz şübhəsiz ki, dərin institusional problemlə və saxta seçkilərlə üz-üzəyik. Söhbət qeyri-legitim prezidentin andiçməsindən gedir". O, əlində sübutların olduğunu desə də, onları ictimaiyyətə təqdim etməyib.
Petronun sözlərinə görə, iyun seçkiləri "alqoritmik, sistemli və çox böyük miqyaslı seçki saxtakarlığı" nəticəsində keçirilib və səsvermənin nəticələri xaricdən manipulyasiya edilərək İvan Sepedanın zərərinə dəyişdirilib.
Sərt sağçı siyasətçi Abelardo de la Esprielya iyun ayında keçirilən prezident seçkilərinin ikinci turunda Qustavo Petronun dəstəklədiyi namizəd İvan Sepedanı cüzi fərqlə məğlub edib. Hakimiyyətin təhvil verilməsi mərasimi ənənəyə zidd olaraq paytaxt Boqotada parlament binası qarşısında deyil, cümə günü ölkənin qərbində yerləşən Kali şəhərində keçiriləcək. Konqresdəki solçu fraksiya mərasimi boykot edəcəyini açıqlayıb və həmin gün Boqota, Kali və Barrankilyada etiraz aksiyalarına çağırış edib.
2019-2021-ci illərdə Qustavo Petronun əvvəlki prezident İvan Duke hökumətinə qarşı dəstəklədiyi etiraz aksiyaları zamanı onlarla insan həlak olmuşdu.
Siyasətdə yeni olan vəkil Abelardo de la Esprielya seçki kampaniyası zamanı ABŞ Prezidenti Donald Trampın dəstəyini almışdı. O, Petro hakimiyyəti dövründə güclənən cinayətkar qruplar və silahlı üsyançılara qarşı sərt mübarizə aparacağını vəd edib. Petronun sülh danışıqları cəhdləri isə ciddi nəticə verməyib və ölkə son on ilin ən ağır zorakılıq dalğası ilə üzləşib.
ABŞ prezidentini Kolumbiyanın daxili işlərinə qarışmaqda ittiham edən Petro bildirib ki, de la Esprielya onu saxta ittihamlar əsasında ABŞ-yə ekstradisiya etdirməyi planlaşdırır.
