Bakı. Trend:
Donald Tramp hazırda Britaniyanın nəzarətində olan, lakin Argentina tərəfindən də suverenliyi iddia edilən Atlantik okeanındakı Folklend adaları ilə bağlı ABŞ-nin neytral mövqeyinə “yenidən baxılmasını” istisna etmir.
İndiyədək ABŞ, əksər Qərb ölkələri kimi, Böyük Britaniyanın bu adaları faktiki olaraq idarə etdiyini qəbul edib, lakin adaların suverenliyinə dair konkret mövqe bildirməyib.
ABŞ prezidenti Oval kabinetdə bu məsələ ilə bağlı suala cavab verərkən deyib: “Mən həmişə bütün mövqelərə yenidən baxıram. Bu da digərləri kimi mövqelərdən biridir”.
Britaniyanın "The Telegraph" qəzeti yaxın vaxtlarda yazmışdı ki, London hərbi xərclərini artırmasa, Vaşinqton öz mövqeyinə yenidən baxmaq və Britaniyanın adalar üzərində suverenliyinin tanınmasına açıq şəkildə qarşı çıxmaqla hədələyir.
Argentinanın Pataqoniya sahillərindən 600 kilometr məsafədə yerləşən Folklend adaları 1982-ci ildə Argentina ilə Böyük Britaniya arasında müharibəyə səhnə olub. 74 gün davam edən müharibə nəticəsində 649 argentinalı və 255 britaniyalı həlak olub.
Bu münaqişədə məğlub olduqdan sonra Argentina adalar üzərində suverenlik iddiasını davam etdirir. Bununla yanaşı, Argentina Prezidenti Xavyer Miley Donald Trampın yaxın müttəfiqidir.
