Bakı. Trend:
Birləşmiş Millətlər Təşkilatının Ümumdünya Ərzaq Proqramı (ÜƏP) Konqo Demokratik Respublikasının (KDR) şərqində tüğyan edən Ebola epidemiyası ilə bağlı həyəcan təbili çalıb. Qurum böhranın qarşısını almaq üçün bölgəyə təcili humanitar ərzaq yardımının çatdırılmalı olduğunu bəyan edib.
Bu barədə "BMT Xəbərləri" portalının məlumat yayıb.
Məlumata görə, ÜƏP-nin KDR üzrə ölkə direktoru Devid Stivenson regional epidemiya ilə bağlı mühüm açıqlamalar verib. Stivenson vurğulayıb ki, ölümcül virusa qarşı mübarizə yalnız tibbi müdaxilə və səhiyyə xidmətləri ilə məhdudlaşmamalıdır. Onun sözlərinə görə, davam edən silahlı münaqişələr, kütləvi köçkünlük və kəskin qida çatışmazlığından əziyyət çəkən yerli icmaların epidemiya qarşısında tab gətirməsi üçün ərzaq təhlükəsizliyi mütləq təmin edilməlidir.
Ölkə direktoru İturi əyalətindəki humanitar fəlakətin miqyasını rəqəmlərlə diqqətə çatdırıb. Bildirib ki, hazırda bölgədə 500 mindən çox insan aclıqla üz-üzədir. Bu, qlobal şkalada fəlakətdən əvvəlki sonuncu kritik mərhələ hesab olunur. Mövcud qida böhranının epidemiya ilə mübarizə tədbirlərini iflic etdiyini deyən Stivenson, xüsusilə nəqliyyat və təhlükəsizlik baxımından çətin əli çatan ucqar ərazilərə humanitar yardımların fasiləsiz ötürülməsinin vacibliyini qeyd edib. ÜƏP rəsmisi Eboladan ən çox zərər çəkən icmaları xilas etmək və virusun daha geniş coğrafiyaya yayılmasının qarşısını almaq üçün beynəlxalq donorları təcili olaraq əlavə maliyyə resursları ayırmağa çağırıb. Qeyd edib ki, Eboladan ən çox təsirlənən icmaları dəstəkləmək üçün təcili olaraq daha çox resursa ehtiyac var.
