Bakı.Trend:
Böyük Britaniya Aİ-dən kənarda qala bilər, lakin əhalinin iradəsi belə olarsa, Avropa birliyinə yenidən qayıda da bilər.
Bunu Böyük Britaniyanın Baş naziri Endi Börnhem "BBC" radiosuna müsahibəsində deyib.
“Biz hər şeyi olduğu kimi saxlaya bilərik. Əgər insanlar mövcud vəziyyətin qorunmasının lazım olduğunu düşünürlərsə, bu, əlbəttə, variantlardan biridir. Biz [keçmiş maliyyə naziri] Corc Osbornun gömrük ittifaqı ilə bağlı dediklərini nəzərdən keçirə, liberal-demokratların qurultaylarında səsləndirdikləri vahid bazarla bağlı təklifi müzakirə edə və ya prosesi sona qədər davam etdirə bilərik”, - deyə Börnhem bildirib.
2016-cı ildə britaniyalıların Brüssellə “boşanma”nın lehinə cüzi səs çoxluğu ilə səs verdiyi referendumdan əvvəl o, Böyük Britaniyanın Aİ üzvlüyünün saxlanılmasını dəstəkləyib və ölkənin birlikdən çıxmasının tərəfdarlarını tənqid edib.
Bir gün əvvəl rəhbərlik etdiyi hakim Leyboristlər Partiyasının qurultayında çıxış edən Baş nazir ölkənin bu məsələ ilə bağlı uzunmüddətli mövqeyini müəyyənləşdirmək üçün “konsensus tapmağa” çalışacağını bildirib. Lakin bunun necə həyata keçiriləcəyini açıqlamayıb. "Brexit" xeyirdən daha çox zərər gətirib”, - hökumət başçısı qeyd edib.
Böyük Britaniyanın Aİ-dən çıxması ilə bağlı referendum 23 iyun 2016-cı ildə keçirilib. Britaniyalıların 51,9%-i üzvlüyün dayandırılmasının, 48,1%-i isə əleyhinə səs verib. Bir neçə il davam edən danışıqlardan sonra krallıq 1 fevral 2020-ci il gecəsi Aİ-ni tərk edib. 1 yanvar 2021-ci ildə Brexit-dən sonra tətbiq olunan keçid dövrü başa çatıb. Bu müddət ərzində Böyük Britaniyaya bütün Avropa normaları şamil olunub. Tərəflər 2020-ci ilin dekabrında Brexit-dən sonrakı münasibətlərə dair saziş imzalayıblar.
