...

Milli geyimlərimizə həsr olunan sərgi açılıb (FOTO)

Mədəniyyət Materials 4 İyul 2017 17:48 (UTC +04:00)
AMEA Milli Azərbaycan Tarixi Muzeyində Muzeyin və Milli Təhsil Texnologiyaları Mərkəzinin təşkilatçılığı ilə “Azərbaycan milli geyimləri olduğu kimi” sərgisinin açılışı keçirilib.
Milli geyimlərimizə həsr olunan sərgi açılıb (FOTO)

Bakı. Trend:

AMEA Milli Azərbaycan Tarixi Muzeyində Muzeyin və Milli Təhsil Texnologiyaları Mərkəzinin təşkilatçılığı ilə bu gün “Azərbaycan milli geyimləri olduğu kimi” sərgisinin açılışı keçirilib.

Muzeydən Trend-ə verilən məlumata görə, sərgini Milli Azərbaycan Tarixi Muzeyinin direktoru, akademik Nailə Vəlixanlı açıq elan edərək milli geyimlərimizə həsr olunan sərginin əhəmiyyətindən danışıb.

Sonra sərgidə təqdim olunan geyimlərin müəllifi, sənətşünaslıq üzrə elmlər doktoru Səbirə Dünyamalıyeva geyimlərin dövrlər, bölgələr üzrə hazırlanma texnologiyası haqqında qonaqlara ətraflı məlumat verib. Onun Azərbaycan, Gürcüstan və İrandakı muzey və kolleksiyalarda apardığı tədqiqatlar nəticəsində XIX əsrin sonu - XX əsrin əvvəllərində Azərbaycanda mövcud olmuş geyim növlərinin norma və qaydaları müəyyən edilib, onların əsasında milli geyim standartları tərtib edilib.

Sərginin kuratoru, Muzeyin Elmi ekspozisiya və sərgilərin təşkili şöbəsinin müdiri, tarix üzrə fəlsəfə doktoru Səbuhi Əhmədov da tədbirdə çıxış edib. O, sərginin təşkil edilməsinin məqsəd və mahiyyətindən bəhs edərək mədəni irsimiz olan milli geyimlərimizin yaranma tarixi haqqında məlumat verib.

Sərginin əsas məqsədi qloballaşan dünyada Azərbaycan mədəniyyətinin qorunub saxlanmasına və gələcək nəsillərə təhrifsiz ötürülməsinə kömək etməkdir.

Bir sıra xeyriyyəçi həmvətənlərimizin maliyyə dəstəyi və Milli Təhsil Texnologiyaları Mərkəzinin dəstəyi ilə milli geyim standartlarına uyğun olaraq, ənənəvi materiallar və üsullar tətbiq edilməklə kişi və qadın geyim dəstləri tikilib. Sərgidə milli geyimlərlə bərabər, Muzeyin kolleksiyasında olan tarixi fotoşəkillər, eləcə də müvafiq məlumatlar təqdim olunur. Sərgidə nümayiş olunan materiallar Muzey tərəfindən nəşr olunmuş kataloqda əks olunub.

Sonda Azərbaycan milli geyimlərinin öyrənilməsinə və təbliğinə töhfə verənlərə, sərgidə təqdim olunan geyimlərin hazırlanmasına, eləcə də tədbirin təşkilinə maddi və mənəvi dəstək göstərənlərə təşəkkürnamələr təqdim edilib.

Məqalədə:
Xəbər lenti

Xəbər lenti