Azərbaycanın qərbində mina partlayışı baş verib

Azərbaycan, Baks, 14 avqust / Trend , muxbir K.Zərbalıyeva /

Azərbaycanın Füzuli rayonunda mina partlayışı baş verib.
Azərbaycan Ərazilərinin Minalardan Təmizlənməsi üzrə Milli Agentliyin (ANAMA) mətbuat xidmətindən cümə günü  Trend -a verilən məlumata görə, avqustun 13-də saat 23.00 radələrində Füzulinin Qaraxanbəyli kəndi ərazisində rayonun Əhmədalılar kənd sakini, 41 yaşlı Cəfər Məhərrəmov traktorla yer şumlayarkən tank əleyhinə minaya düşüb.
Hadisə nəticəsində Məhərrəmov qarın nahiyəsindən və qolundan yüngül xəsarət alıb.
Agentlik bildirir ki, həmin ərazilərin təhlükəli olduğu barədə əhaliyə xəbərdarlıq olunmasına baxmayaraq, ərazidə kənd təsərrüfatı işlərinin aparılması davam etdirilir.
ANAMA tərəfindən avqust ayınadək 107644692 kv.m ərazi təmizlənib. Tapılıb zərərsizləşdirilmiş mina və PHS-lərin sayı 468170-dir.
Agentlik tərəfindən təmizləmə əməliyyatları Tərtər, Ağdam, Füzuli, Tovuz, Ağstafa rayonlarında və Bakı şəhərinin Qaradağ rayonu ərazisində aparılır.
Ötən ay 2 mina/PHS hadisəsi qeydə alınıb və nəticədə 3 nəfər müxtəlif dərəcəli bədən xəsarətləri alıb.

Məqalə müəllifi ilə əlaqə unvanı: [email protected]