Güc tətbiq edilməməsi, ərazi bütövlüyü və xalqların öz müqəddəratını təyin etməsi hüququ prinsipləri əsasında dinc yolla nizamlanmalı olan Dağlıq Qarabağ münaqişəsinin həllində status-kvonun saxlanması əlverişli variant deyil. Avropa Komissiyasının prezidenti Joze Manuel Barrozo bu qənaətdədir.
Trend-in məlumatına görə, "Mediamaks" agentliyi bildirir ki, Avropa Komissiyasının prezidenti bu barədə martın 15-də Ermənistanın baş naziri Tiqran Sarkisyanla Brüsseldə keçirdiyi görüşdən sonra bəyan edib.
"Dağlıq Qarabağdakı təmas xəttində silahlı insidentlərin baş verməsi və regionun hərbiləşdirilməsinin davam etməsi barədə məlumatlar bizi narahat edir", - Barrozo bildirib.
Avropa Komissiyasının rəhbəri deyib ki, Aİ Ermənistan-Türkiyə münasibətlərinin normallaşdırılması prosesini qətiyyətlə dəstəkləməkdə davam edir.
"Biz hər iki tərəfi bu tarixi prosesə sadiqliyi qoruyub saxlamağa çağırırıq. Əminəm ki, gələcəkdə bu dialoq üçün yeni imkanlar açılacaq", - Joze Manuel Barrozo deyib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.