Azərbaycan, Bakı / Trend , müxbir S.İlhamqızı/ Azərbaycan Kommunist Partiyasının (AKP) ikiyə bölünmüş tərəfləri -Rüstəm Şahsuvarov və Rauf Qurbanovun tərəfdarları bir-birlərindən məhkəməyə və Ədliyyə Nazirliyinə şikayət verəcəklər. Bu barədə bazar ertəsi Trend ə Qurbanov və Şahsuvarov açıqlama veriblər.
AKP-nin sədri Ramiz Əhmədov vəfat etdikdən sonra partiya iki yerə - sədr müavinləri Şahsuvarov və Qurbanovun tərəfdarlarına bölünüblər. Partiyanın sentyabrın 22-də keçirilən Plenumunda Qurbanov sədr müavini vəzifəsindən azad edilib. Qurbanovun tərəfdarları isə, Plenumu tərk edərək, Mərkəzi Komitənin buraxılmasına qərar verib və qurultayın çağırılması üzrə Təşkilat Komitəsi yaradıblar.
Şahsuvarovun tərəfdarları oktyabrın 14-də qurultay keçirəcəklər. Onların sədrliyə namizədi Şahsuvarovdur. Digər tərəfin nümayəndələri isə, öz qurultaylarında Qurbanovu sədr seçmək niyyətindədirlər.
Qurbanov bildirib ki, o, Ədliyyə Nazirliyinə müraciət etməyə hazırlaşır.
Şahsuvarovun tərəfdarlarının oktyabrın 14-də keçirəcəyi qurultayın qeyri-legitim olacağını deyən Qurbanov əlavə edib ki, AKP-nin 50 rayon təşkilatından 35-dən çoxu həmin tədbirdə iştirak etməyəcək. Ona görə də Qurbanov Ədliyyə Nazirliyinə müraciətində oktyabrın 14-də keçirləcək qurultayın tanınmamasını xahiş edəcək.
Şahsuvarov isə bildirib ki, Qurbanovun tərəfdarları ayrılıqda qurultay keçirib, sənədlərini Ədliyyə Nazirliyinə təqdlim edəcəyi təqdirdə, onlardan məhkəməyə şikayət verəcək.
AKP solçu, müxalifətyönlü partiyadır.