Azərbaycan, Bakı, 12 fevral / Trend , müxbir S.İlhamqızı/ Azərbaycan Demokrat Partiyasının sədri Sərdar Cəlaloğlu hesab edir ki, prezident seçkisini boykot edən siyasi qüvvələr seçkidə iştirak edənləri günahlandırmamalı, əhaliyə onların əleyhinə çağırışlar etməməlidirlər.
"Biz seçkini boykot etmək istəyənlərin sahəsinə girmirik, onlar da bizim sahəmizə girməsinlər"-deyə Cəlaloğlu çərşənbə axşamı Trend ə açıqlamasında bilidrib.
Bu ilin oktyabrında Azərbaycanda növbəti prezident seçkisi keçiriləcək. Müxalifət düşərgəsindən Müsavat, ADP, Ümid, Böyük Quruluş partiyaları seçkidə öz namizədi ilə iştirak edəcəyini, AXCP, ALP və VİP-in təmsil olunduğu "Azadlıq" bloku isə, hələlik seçkini boykot etdiyini açıqlayıb.
"Azadlıq" blokunun həmsədri Əli Əliyev Trend ə açıqlamasında bildirib ki, blok seçkidə iştirak etməyəcəksə, ölkə əhalisini seçkini boykot etməyə çağbıracaq.
ADP sədri isə, hesab edir ki, seçkini boykot edən partiyalar bütöv cəmiyyəti öz təsir dairəsinə daxil etməməlidirlər. Onun fikrincə, "Azadlıq" blokunun boykot çağırışı effektiv nəticə verməyəcəyək: "Onların tərəfdarları səsvermədə iştirak etməyəcəklər. Amma bütövlükdə xalq boykota hazır deyil, siyasi qüvvələrin də hamısının boykot qərarı yoxdur, elə siyasi qüvvələr də var ki, onlar heç vaxt seçkini boykot etməyəcəklər. Deməli, "Azadlıq" blokunun qərarı, nəticə etibarilə, passiv boykot olacaq və sadəcə, seçkidə iştirak etməmək kimi qəbul ediləcək"-deyə ADP sədri bildirib.
Sağ təmayüllü partiya olan ADP 1991-ci ildə Sərdar Cəlaloğlu tərəfindən təsis edilib. Partiya 2007-ci ilin yanvarınadək iqtidara qarşı radikal müxalif mövqedə olub. Ötən ilin yanvarında ADP-nin hakimiyyətlə dialoq qurulması ilə bağlı yeni siyasi kursu qəbul edilib.
Müəlliflə əlaqə saxlamaq üçün elektron ünvan - [email protected]