Azərbaycan, Bakı, 11 aprel / Trend , müxbir S.İlhamqızı/ Müxalifətçi Vətəndaş Həmrəyliyi Partiyasının sədri, keçmiş prezidentliyə namizəd Sabir Rüstəmxanlı buliki prezident seçkisində müxalifət liderlərinin şansı olmadığını düşünür.
"Hazırda adları çəkilən və prezidentliyə iddiasını bildirən şəxslərin heç birinin seçkidə qalib gəlmək şansı yoxdur"-deyə Rüstəmxanlı Trend a asıqlamasında bildirib.
Bu ilin oktyabrında Azərbaycanda keçiriləcək prezident seçkisində müxalifət düşərgəsindən artıq Müsavat Partiyasının başqanı İsa Qəmbər, Azərbaycan Demokrat Paprtiyasının sədri Sərdar Cəlaloğlu, Ümid Partiyasının sədri İqbal Ağazadə, Böyük Quruluş Partiyasının sədri Fazil Qəzənfəroğlu namizəd olacaqlarını bəyan ediblər. Hakim Yeni Azərbaycan Partiyası da indiki prezident İlham Əliyevin iqtidarın namizədi olacağını açıqlayıb.
VHP sədri bildirib ki, ölkədə seçki ovqatı duyulmur, müxalifət düşərgəsində isə ümumiyyətlə seçki ilə bağlı heç bir addım atılmır: "Mən də heç bir təşəbbüs göstərmirəm. Çünki seçkinin taleyini həl edən mühüm faktorlar - seçicilərin fəallığı, şəraitin yetişməsi, qüvvələr nisbətinin dəyişməsi, seçkiqabağı vəziyyət - bunların heç biri müxalifətin xeyrinə deyil"-deyə Rüstəmxanlı bildirib.
O, əlavə edib ki, VHP müxalifət düşərgəsindən olan namizədlərin heç birinə dəstək verməyəcək. Onun fikrincə, müxalifət düşərgəsindən iqtidarın namizədinə qalib gələ biləcək namizəd yoxdur: "Müxalifət düşərgəsində real, şanslı birini görsəydim 100 faiz onu dəstəkləyərdim, lakin mən belə bir adam görmürəm. Hesab edirəm ki, adları çəkilən iddialıların heç birinin bu seçkidə qalib gəlmək şansı yoxdur"-deyə VHR sədri bildirib.
O, özünün növbəti dəfə də namizəd olub-olmayacağı barədə hələ qərara gəlmədiyini deyib. Rüstəmxanlının sözlərinə görə, VHP-nin 2008-ci ilin prezident seçkisində öz namizədi ilə iştirak edib-etməyəcəyinə isə partiya Məclisinin bu ay keçiriləcək toplantısında qərar verilə bilər.
VHP Milli Azadlıq Hərəkatının liderlərindən olan Rüstəmxanlının rəhbərliyi altında 1992-ci ildə bir qrup ziyalı tərəfindən yaradılıb. Partiyanın 35 mindən artıq üzvü olduğu bildirilir. VHP 1995, 2000, 2005-ci ilin parlament, 2003-cü ilin prezident, 1999, 2004-cü ilin bələdiyyə seçkilərində iştirak edib. Partiyanın sədri millət vəkili, xalq şairi Rüstəmxanlı 1991-95-ci illərdə mətbuat və informasiya naziri, 2003-cü il prezident seçkilərində isə prezidentliyə namizəd olub.
Müəlliflə əlaqə saxlamaq üçün elektron ünvan - [email protected]
