Azərbaycan, Bakı, 01 may/ Trend , müxbir İ.Əlizadə/ Azərbaycan müxalifətini təmsil edən Açıq Cəmiyyət Partiyası (ACP) hazırda fəaliyyət göstərdiyi qərargahdan çıxarılır. "Hazırda fəaliyyət göstərdiyimiz qərargahın sahibi ilə mayın səkkizinədək qüvvədə olan müqaviləmiz var. Mayın səkkizində qərərgahın sahibinə yeni müqavilə imzalamağı təklif edəcəyik. Əgər yeni müqavilə imzalanmasa, hazırda fəaliyyət göstərdiyimiz qərargahı tərk edəcəyik",- deyə cümə axşamı Trend -a açıqlamasında ACP-nin sədr müavini Yaqub Abbasov məlumat verib.
ACP hazırda İçəri Şəhərdə, Kiçik Qala küçəsi 128 ünvanında yerləşən qərargahda fəaliyyət göstərir. Qərargah ACP lideri, parlamentin keçmiş sədri Rəsul Quliyevin yeznəsi İdris Quliyevə məxsusdur. Eks-spikerlə yeznəsi arasında qalmaqal yaranıb. Ona görə də İdris Quliyev ACP-nin ona məxsus olan mülkdən çıxmasını tələb edir.
Abbasov bildirib ki, artıq yeni qərargah tapıblar. Lakin yeni qərargahın harada yerləşdiyini açıqlmayıb: "Bizim alternativ yerimiz var".
Sədr müavini qeyd edib ki, qərargah sahibinin tələbinə baxmayaraq, müqavilə müddəti bitməmiş fəaliyyət göstərdikləri ünvanı tərk etməyəcəklər.
Sağ mərkəzçi, müxalifətyönlü ACP bu ilin aprelində təsis olunub. Partiyanın lideri Azərbaycanın eks-spikeri, hazırda mühacirətdə yaşayan Rəsul Quliyevdir. Azərbaycanın hüquq-mühafizə orqanları Quliyev barəsində cinayət işi açıblar və eks-spiker İnterpol vasitəsi ilə beynəlxalq axtarışa verilib. O, dövlət əmlakını mənimsəməkdə, vəzifəsindən sui-istifadədə, vəzifə səlahiyyətlərini aşmaqda ittiham olunur. Quliyev bu ittihamları rədd edir. 2007- ci ilin fevralınadək ADP-nin sədri olmuş Rəsul Quliyev və onun tərəfdarları etiraz olaraq ADP- dən imtina ediblər və özlərinin Açıq Cəmiyyət Partiyasını yaradıblar.
Məqalə müəllifi ilə əlaqə ünvanı: [email protected]
