Azərbaycan, Bakı, 26 may / Trend , müxbir M.Əliyev/ ABŞ Dövlət katibinin energetika məsələri üzrə müavin köməkçisi Metyu Brayza hər il keçirilən "Caspian oil and gas" sərgisində iştirak etmək üçün iyunun əvvəlində Azərbaycana səfər edəcək. Bu barədə Trend -a bazar ertəsi Vaşinqtondan elektron poçt ilə Brayza məlumat verib.
Cari il iyun ayının 3-də 15-ci "Caspian oil and gas" beynəlxalq sərgisi keçiriləcək.
Brayza mayın 24-də Ukraynada keçirilən enerji sammiti çərçivəsində Azərbaycan prezidenti İlham Əliyev ilə görüşünə də toxunub. "Biz enerji təhlükəsizliyi məsələlərini müzakirə etdik", - deyə o bildirib.
Türkmənistan prezidenti Qurbanqulu Berdiməhəmmədovun bu yaxınlarda Azərbaycana etdiyi səfəri şərh edən amerikalı diplomat bildirib ki, "ABŞ iki ölkənin münasibətlərin yaxşılaşdırılması istiqamətində atdığı son addımları alqışlayır".
Türkmənistan prezidentinin Azərbaycana səfəri mayın 19-20-də baş tutmuşdu. Görüş zamanı yeddi birgə müqavilə imzalanıb və enerji sahəsində əməkdaşlıq məsələləri müzakirə olunub.
Məqalə müəllifi ilə əlaqə ünvanı: trend
