Fransa, Strasburq, 06 iyun / Trend , müxbir A.Məhərrəmli/ Avropa Şurası Baş katibinin faktaraşdırıcı missiyasının Azərbaycan və Ermənistanda araşdıracağı mədəni və tarixi abidələrin yekun siyahısı iyulun 18-də hər iki ölkənin əlaqədar qurumlarına təqdim ediləcək. Bu barədə Trend -a Avropa Şurası Katibliyinin Mədəniyyət və mədəni və təbii irs üzrə Direktoratlığından məlumat verilib.
Azərbaycan və Ermənistan abidələrin siyahısı ilə bağlı mövqeyini sentyabr ayının əvvəlində bildirəcək.
Faktaraşdırıcı missiyanın səfərinin dəqiq tarixi haqqında məlumat verilməyib: "Səfərin bu ilin payızında baş tutacağı ehtimal edilir" - deyə Avropa Şurası Katibliyindən bildirilib.
AŞ Baş katibinin təşəbbüsü ilə Azərbaycan və Ermənistanda mədəni, tarixi və dini abidələrin vəziyyətinin araşdırılması üçün faktaraşdırıcı missiyanın göndərilməsi qərara alınıb.
Hazırda AŞ Katibliyinin müstəqil ekspertləri tərəfindən hər iki ölkənin təqdim etdiyi məntəqələrin, abidələrin və mədəni irsə aid nümunələrin siyahısı, onların yerinin müəyyənləşdirilməsi nəzərdən keçirilir.
Ekspertlər diqqəti öncə Ermənistan və Azərbaycandakı mədəniyyət abidələrinin vəziyyətinin araşdırılmasına yönəldəcəklər. Gürcüstana isə səfər istisna edilməsə də, bunun hal-hazırda müzakirə olunmadığı qeyd olunub.
AŞ Katibliyindən bildirilib ki, Azərbaycan və Ermənistana yekun siyahı haqqında məlumat verildikdən sonra bölgəyə səfər edəcək müstəqil ekspertlər qrupunun tərkibi müəyyənləşdiriləcək. Bu isə yekun siyahıda əksini tapacaq mədəniyyət abidələrinin təbiətindən asılı olacaq.
Məqalə müəllifi ilə əlaqə saxlamaq üçün elektron ünvan [email protected]